الماتىدا جاڭا جىلدىق شىرشالار جارمەڭكەسى ۇيىمداستىرىلدى

جاڭا جىل جاقىنداعان سايىن الماتىداعى پانفيلوۆ كوشەسى قىلقان جاپىراقتىڭ ءيىسى مەن مەرەكەلىك كوڭىل-كۇيگە تولى ناعىز قىسقى بازارعا اينالدى. جارمەڭكە اركىم ۇيىنە جاڭا جىلدىق شىرشا تاڭداي الاتىن الماتىلىقتاردىڭ سۇيىكتى ورنىنا اينالدى، دەپ حابارلايدى aqshamnews.kz

جارمەڭكەدە ساتىپ الۋشىلارعا بيىك شىرشادان باستاپ شاعىن ىدىستاعى اعاشتارعا دەيىن ءتۇرلى تاۋار ۇسىنىلعان. 

– مەن جىل سايىن بازاردان شىرشا ساتىپ الامىن، ءبىراق بيىل ءدال وسى جەردەن ساتىپ الۋدى شەشتىم، ويتكەنى باعاسى بىردەي. بالالارمەن كەلىپ شىرشا تاڭداپ جاتىرمىز، پىراندىكتەردەن ءدام تاتىپ، جارقىراعان قوندىرعىلاردىڭ جانىندا سۋرەتكە تۇستىك. مۇنداعى اتموسفەرا كەرەمەت، شارشاعانىڭدى ۇمىتاسىڭ، سۋىق تا سەزىلمەيدى. جاڭا جىلدىڭ جاقىنداپ قالعانى انىق سەزىلەدى، – دەدى ەرلان قاسىموۆ. 

جارمەڭكەدە كلاسسيكالىق قىلقان جاپىراق اعاشتارىمەن قاتار قارمەن كومكەرىلگەندەي ساندەلگەن ديزاينەرلىك شىرشالاردى دا ساتىپ الۋعا بولادى. مۇنداعى اسسورتيمەنتتىڭ مولدىعىن قالا تۇرعىندارى ەرەكشە اتاپ وتۋدە.

– ءبىز قۇربىمىزبەن جاي عانا كورىپ قايتۋعا كەلگەن ەدىك، ءبىراق قىزىعىپ، شىرشا، ويىنشىقتار مەن گيرلياندالار ساتىپ الدىق. ەندى بىرگە جينالىپ، شىرشانى بەزەندىرىپ، كاكاو ىشەمىز. مۇندا سونداي ادەمى، جىلى ءارى جايلى، كەتكىڭ كەلمەيدى. بۇل جارمەڭكە قالانىڭ ەڭ كەرەمەت ورىندارىنىڭ بىرىنە اينالعانىنا سەنىمدىمىن، – دەدى ستۋدەنت الينا ابىلدايەۆا.

جارمەڭكەنىڭ بەزەندىرىلۋى ەرەكشە اسەر قالدىرادى: گيرلياندالار، جارقىراعان شامدار، فوتوايماقتار – مۇنىڭ ءبارى عاجايىپ مەرەكەلىك كوڭىل-كۇي سىيلايدى. اسىرەسە، قار باسقان شانالار، جارقىراعان اققالالار مەن بۇعىنىڭ مۇسىندەرى بالالاردى قۋانتادى.