الماتىدا مەرەكە كۇندەرى قوعامدىق ءتارتىپتى قامتاماسىز ەتۋ ءۇشىن 3 مىڭنان استام پوليسيا قىزمەتكەرى جۇمىلدىرىلدى. الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك وڭىرلىك كوممۋنيكاسيالار قىزمەتىنىڭ بريفينگىندە ايتقانداي، وڭتۇستىك استانادا جاڭا جىلدىق مەرەكە كۇندەرى تىنىش ءوتتى، دەپ حابارلايدى aqshamnews.kz
«الماتى قالاسىنىڭ پوليسيا دەپارتامەنتى وتكەن مەرەكە كۇندەرى تۇراقتى كريمينوگەندىك جاعداي تۋرالى حابارلايدى. قىزمەتتەر مەن بولىمشەلەردىڭ جەكە قۇرامى كۇشەيتىلگەن قىزمەت رەجيمىنە اۋىستىرىلدى. پاترۋلدىك پوليسيا ناريادتارىنىڭ سانى ۇلعايتىلدى، جاياۋ پاترۋلدەۋ مارشرۋتتارى ازىرلەندى، سونداي — اق قۇقىقتىق ءتارتىپتى قورعاۋ ءۇشىن ۇلتتىق ۇلاننىڭ 300 اسكەري قىزمەتشىسى تارتىلدى»،- دەپ اتاپ ءوتتى س.ازىربەك.
ازاماتتار كوپ جينالاتىن جانە مەرەكەلىك ءىس-شارالار وتكىزىلەتىن ورىندارعا ەرەكشە نازار اۋدارىلدى.
31 جەلتوقسان مەن 4 قاڭتار ارالىعىندا الماتىدا 65 قىلمىس تىركەلدى، ولاردىڭ كوپشىلىگى مۇلىكتىك جانە تۇرمىستىق سيپاتتا بولدى. ونىڭ ىشىندە 42 قىلمىس «ءىزى سۋىماي» اشىلدى. سونىمەن قاتار، مەرەكە كۇندەرى 200-دەن استام اكىمشىلىك قۇقىق بۇزۋشىلىق انىقتالىپ، جولى كەسىلدى.
قالا جولدارىندا 26 ماس جۇرگىزۋشى ۇستالىپ، كولىك جۇرگىزۋدەن شەتتەتىلدى، بۇل قاۋىپسىزدىكتى قامتاماسىز ەتۋ جونىندەگى نەگىزگى شارالاردىڭ بىرىنە اينالدى.
«103» پۋلتىنە مەرەكە كۇندەرى 23 مىڭنان استام ءشاقىرتى كەلىپ ءتۇستى، ونىڭ 16 مىڭىنا جەدەل جاردەم بريگادالارى قىزمەت كورسەتتى. بۇل ءۇشىن كۇن سايىن 186 بريگادا تارتىلدى، وندا 500-دەن استام قىزمەتكەر جۇمىس ىستەدى.
«جەدەل جاردەم قىزمەتىنە كەلىپ تۇسكەن شاقىرتۋلاردىڭ 10-13% -ى جاراقاتتانۋعا قاتىستى. پيروتەحنيكالىق قۇرالدارمەن زاقىمدانۋدىڭ 19 جاعدايى تىركەلدى. 55% جاعدايدا اياق — قولدىڭ جاراقاتتانۋى، قالعان جاعدايلاردا بەت، كوز جانە مويىن زارداپ شەكتى»، - دەدى جەدەل مەديسينالىق جاردەم قىزمەتىنىڭ مەديسينالىق ءبولىمى بويىنشا ديرەكتوردىڭ ورىنباسارى اندرەي لوجكين.
مەرەكە كۇندەرى جىلداعى ادەتكە ساي قوڭىراۋلار سانىنىڭ 5-6% - عا ارتتى. وتىنىشتەردىڭ نەگىزگى سەبەپتەرى كەنەتتەن بولاتىن اۋرۋلار، تۇرمىستىق جاراقاتتار، كۇيىكتەر، ىشىمدىكتەن جانە تاماقتان ۋلانۋ بولدى.