الماتىدا «نۇرشاشقان» شاعىن اۋدانى تۇرعىندارىن قولجەتىمدى كولىكپەن قامتاماسىز ەتۋ ءۇشىن جاڭا تۇراقتى اۆتوبۋس باعىتى ۇيىمداستىرىلدى.
№91 باعىتتاعى اۆتوبۋس «نۇرشاشقان» شاعىن اۋدانى – الماتى-2 تەمىرجول ۆوكزالى» باعىتى بويىنشا 13 جەلتوقساننان باستاپ قاتىنايدى، دەپ حابارلايدى aqshamnews.kz.
بۇل باعىتتى «الماتىەلەكتروترانس» ج ش س «Golden Dragon» ماركالى گازبەن جۇرەتىن اۆتوبۋستارىمەن قامتاماسىز ەتەدى. كۇن سايىن 12 اۆتوبۋس جولعا شىعادى، قوزعالىس ارالىعى 12 مينۋت.
ايتا كەتۋ كەرەك، جولاۋشىلار مەن جۇكتى اۆتوكولىكپەن تاسىمالداۋ ەرەجەسىنە سايكەس، مارشرۋت ۋاقىتشا بايقاۋ وتكىزىلگەنگە دەيىن تاسىمالداۋشىعا بەرىلدى جانە سىناق رەجيمدە جۇمىس ىستەيدى. جولاۋشىلار لەگى مەن حالىقتىڭ قاجەتتىلىگىن ەسكەرە وتىرىپ، قوزعالىس سىزباسىنا تۇزەتۋلەر ەنگىزىلۋى مۇمكىن.
ەستەرىڭىزگە سالا كەتەيىك، بيىل مەگاپوليس باسشىسى ەربولات دوسايەۆتىڭ تاپسىرماسىمەن اكىمدىك 600 اۆتوبۋس، 112 تروللەيبۋس جانە 100 ەلەكترواۆتوبۋس ساتىپ الدى. جىل باسىنان بەرى قالالىق موبيلدىلىك باسقارماسى 18 قالا ماڭىنداعى جانە 3 قالا ىشىندەگى مارشرۋتتى ۇيىمداستىردى.