الماتىدا تۇرعىندار مەن قالا قوناقتارىنىڭ قاتىناۋ مۇمكىندىگىن ارتتىرۋ ماقساتىندا بيىل 27 قاراشادان باستاپ «سپورت سارايى – مەدەۋ سپورت كەشەنى» باعىتى بويىنشا جاڭا، تۇراقتى №21 اۆتوبۋس مارشرۋتى ىسكە قوسىلادى، - دەپ حابارلايدى Aqshamnews.kz.
باعىتتىڭ جالپى ۇزىندىعى 33،6 كم. بۇل تۋرالى جول قوزعالىسى جانە جولاۋشىلار كولىگىن ۇيىمداستىرۋ باسقارماسىنىڭ وكىلدەرى حابارلادى.
باعىتقا «الماتىەلەكتروترانس» ج ش س قىزمەت كورسەتەدى. كۇن سايىن 15 اۆتوبۋس جولاۋشىلار تاسىمالداۋعا شىعادى، قوزعالىس ارالىعى - 8 مينۋت. پايدالانىلاتىن كولىك قۇرامى – ۇلكەن سىيىمدىلىقتاعى اۆتوبۋستار: 28 وتىراتىن جانە 85 تۇرەگەپ تۇراتىن ورىن، بۇل تانىمال تۋريستىك ءارى سپورتتىق باعىتتا جولاۋشىلار تاسىمالداۋعا مۇمكىندىك بەرەدى.
اۆتوبۋستار بەينەباقىلاۋ جۇيەسىمەن، سالقىنداتقىشپەن جانە ءموبيلدى قۇرىلعىلاردى قۋاتتاۋعا ارنالعان USB-ۇياشىقتارمەن جابدىقتالعان. جۇرگىزۋشى كابيناسىنا زاماناۋي ەلەكتروندى جۇيە ورناتىلعان، ونىڭ ىشىندە جۇرگىزۋشىنىڭ شارشاۋىن جانە ارەكەتتەرىن باقىلايتىن DMS جۇيەسى بار.
سالوندا ايالدامالاردى اۆتوماتتى تۇردە جاريالاۋ جۇيەسى جۇمىس ىستەيدى. اۆتوماتتاندىرىلعان حابارلاۋ جۇيەسىن قولدانۋ جولاۋشىلاردىڭ جايلىلىعىن ارتتىرىپ، ەرەكشە قاجەتتىلىگى بار ادامدار ءۇشىن قولجەتىمدىلىكتى جاقسارتادى جانە قاجەتتى ايالدامادان ءوتىپ كەتۋ جاعدايىن ازايتۋ ارقىلى قاۋىپسىزدىكتى كۇشەيتەدى.
