الماتىدا رەسپۋبليكا كۇنى قارساڭىندا ۇيىمداستىرىلعان «جاڭا قازاقستان. تازا تابيعات» اتتى جالپىقالالىق سەنبىلىك وتۋدە، دەپ حابارلايدى almaty-akshamy.kz
قالالىق ءماسليحات پەن ەكولوگيالىق بىرلەستىكتەردىڭ باستاماسىمەن ءوتىپ جاتقان سەنبىلىك اياسىندا دەمالىس اۋماقتارى، ساياباقتار، سكۆەرلەر مەن اۋلالاردا تازالىق جۇمىستارىن جۇرگىزىپ، 10 مىڭعا جۋىق ءتۇپ اعاشىن وتىرعىزۋ جوسپارلانعان.
الماتى قالالىق اكىمدىگى كوشەتتەر مەن وتىرعىزۋعا ارنالعان جابدىقتارمەن (قولعاپتار، قاپتار، كۇرەك، تىرمالار) ۇسىنىپ، قاتىسۋشىلاردى سۋمەن قامتاماسىز ەتىپ، جينالعان قوقىستى پوليگونعا شىعارادى.
سەنبىلىك ءوتىپ جاتقان ايماقتاردىڭ ءبىرى - “كوك قاينار” ىقشاۋدانىنداعى بورالداي وزەنىنىڭ جاعاسى.
ۇيىمداستىرۋشىلاردىڭ ايتۋىنشا، ءقازىر بۇل جەردە جوندەۋ جۇمىستارى جۇرگىزىلىپ جاتىر. سوندىقتان وزەن جاعاسىن ءجيى تازالاپ تۇرۋ كەرەك.
ءىس-شارا وتەتىن بارلىق اۋماقتا كونسەرت پەن 15 مينۋتتىق جاتتىعۋ سياقتى مادەني ويىن-ساۋىق باعدارلامالارى قاراستىرىلعان.
“سەنبىلىك ۇيىمداستىرىپ، تازارتۋ جۇمىستارىنا ءمان بەرۋىمىز اسا ماڭىزدى. بورالداي وزەنىنىڭ جاعاسىن تازارتىپ، اعاش وتىرعىزۋعا 4 باسقارمانىڭ قىزمەتكەرلەرى جينالدى. 100 ءتۇپ اعاشى وتىرعىلادى. ولاردىڭ 50ء-ى شىرشا، 30-ى ۇيەڭكى، قالعانى - الما اعاشتارى”،- دەدى الماتى قالاسى جايلى قالالىق ورتا باسقارماسى ءبولىمىنىڭ باسشىسى ەرنار بۋكەشوۆ.
عاليا توقسەيىتوۆا، الماتى قالاسى تۋريزم باسقارماسىنىڭ باسشىسى:
- ەلىمىز ءۇشىن ماڭىزدى مەملەكەتتىك مەرەكە قارساڭىندا ءبىزدىڭ باسقارمانىڭ دا قىزمەتكەرلەرى قولىنا قاجەتتى قۇرال-سايماندارىن الىپ، سەنبىلىككە شىقتى. اعاش وتىرعىزىپ، قوقىستاردى جيناۋعا باسقارمادان 15 قىزمەتكەر كەلدى. مەنىڭ ويىمشا، قالانىڭ ءار تۇرعىنى وسىنداي شارالارعا بەلسەندىلىك تانىتۋى كەرەك.