سوڭعى ۋاقىتتا ۆەيپقۇمار ادامداردىڭ قاتارى ارتىپ بارادى. وسى قۇرىلعىلاردىڭ دەنساۋلىققا كەرى اسەرىنەن بولەك قورشاعان ورتاعا دا زالالى وراسان.
الەمدە ۆەيپكە ارنالعان 844 ميلليون قۇرىلعى جىل سايىن دالاعا تاستالادى. وسىنىڭ ءبارىن قوسسا، 6 "ەيفەل مۇناراسىنا" تەڭ قوقىس شىعادى. دەنساۋلىققا كەسىرىن كەرەك قىلماي جۇرگەن جاستار ەلەكترون شىلىمنىڭ قورشاعان ورتاعا زيانىن تىپتەن ويلامايدى. ءبىر رەتتىك قولدانۋعا ارنالعان قۇرىلعى 1 مىڭ جىلعا دەيىن شىرىمەي، اينالانى لاستاپ جاتا بەرەدى.
ءبىر عانا بريتانيادا اپتا سايىن ءبىر رەتتىك قولدانۋعا ارنالعان 5 ميلليون ەلەكترون تەمەكى قوقىسقا اينالادى. ونداعى ءليتييدىڭ مولشەرى ەلەكترموبيل جاساۋعا قاجەتتى 5 مىڭ اككۋمۋلياتور جاساۋعا جەتكىلىكتى. قولدانۋشىلاردىڭ كوبى ونى قايتا وڭدەۋگە تاپسىرۋ ءۇشىن نە ىستەۋ كەرەكتىگىن بىلمەيدى. جاقىندا جۇرگىزىلگەن ساۋالناماعا قاتىسقانداردىڭ 73 پايىزى ۆەيپتى قوقىس جاشىگىنە تاستاي سالاتىن كورىنەدى. ال ونداعى ليتيي باتارەيالارىنان ءورت شىعۋى مۇمكىن. مىسالى، اقش-تا سوڭعى 7 جىلدا وسىنداي 250 وقيعا تىركەلگەن.