الماتىدا جالعان شوت-فاكتۋرالاردى پايدالانۋ ارقىلى مەملەكەتكە 686 ميلليون تەڭگە كولەمىندە زالال كەلتىرگەن ۇيىمداسقان قىلمىستىق توپ مۇشەلەرىنە سوت ۇكىمى شىقتى، - دەپ حابارلايدى Aqshamnews.kz.
بۇل تۋرالى قالا پروكۋراتۋراسى حابارلادى.
تەرگەپ-تەكسەرۋ بارىسىندا انىقتالعانداي، ءبىر توپ ادام تاۋارلار مەن قىزمەتتەردى ناقتى ورىنداماستان، جالعان شوت-فاكتۋرالاردى راسىمدەۋ ارقىلى سالىق تولەمىنەن جالتارۋ سحەماسىن ۇيىمداستىرعان. قىلمىستىق ارەكەتتى جاسىرۋ ماقساتىندا ولار جالعان بىرىكتىرۋ راسىمدەرىن جۇرگىزىپ، فورمالدى تۇردە تىركەلگەن سەرىكتەستىكتەردى كەيىننەن جويعان.
اتالعان زاڭبۇزۋشىلىقتار سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىندە تىركەلگەن. قالا پروكۋراتۋراسىنىڭ قاداعالاۋ شارالارى ناتيجەسىندە زاڭسىز بىرىكتىرۋ ارەكەتى توقتاتىلدى.
الماتى قالاسىنىڭ سوتى توپتىڭ التى قاتىسۋشىسىن ق ر قىلمىستىق كودەكسىنىڭ:
- 216-بابى – (شوت-فاكتۋرالاردى، ەسەپ-فاكتۋرالاردى جالعان جاساۋ)
- 262-بابى – (ۇيىمداسقان قىلمىستىق توپتى قۇرۋ جانە وعان باسشىلىق ەتۋ) بويىنشا كىنالى دەپ تانىدى.
سوت ۇكىمىنە سايكەس، ءاربىر سوتتالۋشى قىلمىستىڭ اۋىرلىعىنا بايلانىستى 6 جىلدان 8 جىلعا دەيىن باس بوستاندىعىنان ايىرىلدى.