الماتىداعى «The Ritz-Carlton» ءقوناقۇيىنىڭ قىزمەتكەرلەر مەن كەلۋشىلەر جارىلعىش زات قويىلعانى تۋرالى مالىمەتكە بايلانىستى ەۆاكۋاسيالاندى، دەپ حابارلايدى almaty-akshamy.kz
الماتى قالالىق پوليسيا دەپارتامەنتىنىڭ دەرەگىنە سايكەس، 3 قىركۇيەك، تۇنگى ساعات 23:51-دە بوستاندىق اۋدانىندا ورنالاسقان قوناقۇيگە جارىلعىش زات قويىلعانى تۋرالى حابارلاما تۇسكەن.
اتالعان نىسانعا قالانىڭ جەدەل قىزمەتتەرى شۇعىل جىبەرىلگەن. ءقوناقۇيدىڭ قىزمەتكەرلەرى مەن كەلۋشىلەرى ەۆاكۋاسيالاندى. ساپەر بولىمشەسى كوپقاباتتى عيماراتتى ەكى ساعاتتان ارتىق تەكسەردى.
«تەكسەرىس ناتيجەسىندە جارىلعىش زات تابىلعان جوق. قازىرگى ۋاقىتتا ءانونيمدى حابار بەرگەن ادامدى انىقتاۋ، ونى ۇستاۋ جانە ارى قاراي جاۋاپقا تارتۋ باعىتىندا كەشەندى جەدەل شارالار ءجۇرىپ جاتىر»، - دەپ حابارلادى پوليسيا دەپارتامەنتىنىڭ باسپا ءسوز قىزمەتىنەن.