الماتىدا “كيبەرپول” قىزمەتكەرلەرى قالالىق پروكۋراتۋرانىڭ ۇيلەستىرۋىمەن ارنايى وپەراسيا جۇرگىزدى.
وپەراسيا بارىسىندا تۇرعىن ءۇي كەشەندەرىنىڭ بىرىندەگى جالدامالى پاتەردە ۇيىمداستىرىلعان شاعىن اۆتوماتتى تەلەفون ستانسياسى انىقتالدى. 26 جاستاعى ازامات ۇستالدى، دەپ حابارلايدى aqshamnews.kz Polisia.kz-كە سىلتەمە جاساپ.
– ءۇيدى ءتىنتۋ كەزىندە 32 SIM-كارتا سلوتى بار SIM-قوراپ جابدىعى، سونداي-اق ۇيالى بايلانىس كومپانيالارىنىڭ بىرىنە تيەسىلى 285 SIM كارتاسى تابىلدى. بۇل جابدىقتى ينتەرنەت-الاياقتار ءانونيمدى بولىپ قالا وتىرىپ، ءارتۇرلى ينتەرنەت-قىزمەتتەردى جانە مەسسەندجەرلەردى بەلسەندىرۋ، اككاۋنتتاردى تىركەۋ ءۇشىن پايدالانادى، ولاردىڭ كومەگىمەن الاياقتار باسقا ەلدە بولا تۇرا قازاقستاندىقتارعا تەلەفون سوعادى. كۇدىكتى وسى جابدىقتى ورناتۋ، قوسۋ جانە سلوتتارداعى SIM-كارتالاردى اۋىستىرۋدان تۇراتىن “جۇمىستى” ينتەرنەتتەن تاپقانىن ايتتى. قازىرگى ۋاقىتتا قىلمىستىق ءىس اياسىندا جەدەل شارالار جۇرگىزىلىپ جاتىر. ۇستالعان ازامات قاماۋعا الىندى، – دەدى الماتى قالالىق پوليسيا دەپارتامەنتى باستىعىنىڭ ءبىرىنشى ورىنباسارى قۋاتبەك ناۋاتوۆ.