الماتىدا جاياۋ جۇرگىنشىلەردى وتكىزبەيتىن جۇرگىزۋشىلەر كوبەيگەن

ەندى ولاردى Sergek تىركەيتىن بولادى.

مينيسترلىكتىڭ مالىمەتىنشە، 11 ايدا 556 جاياۋ جۇرگىنشى قايتىس بولدى، ونىڭ 478ء-ى جاياۋ جۇرگىنشىلەر وتكەلىندە كوز جۇمعان، دەپ حابارلايدى Almaty-akshamy.kz

Sergek ينتەللەكتۋالدى جۇيەسىنىڭ جاياۋ جۇرگىنشى وتكەلدەرىندە ادامداردى ەلەمەيتىن جۇرگىزۋشىلەردى تىركەيتىن پيلوتتىق جوباسى الماتىدا ىسكە قوسىلدى.

بۇدان بىلاي اكىمشىلىك قۇقىقبۇزۋشىلىق كودەكستىڭ 600-بابىنا سايكەس “جاياۋ جۇرگىنشىلەردىڭ نەمەسە جول قوزعالىسىنىڭ وزگە دە قاتىسۋشىلارىنىڭ جۇرۋىنە باسىمدىق بەرمەۋ” تىركەلەتىن بولادى.

مىسالى، ەگەر اۆتوكولىك جاياۋ جۇرگىنشىدەن كەيىن جۇرسە، بۇل جول ءجۇرىسى قاعيداسىن بۇزۋ بولىپ سانالمايدى. ال ەگەر جۇرگىزۋشى جاياۋ جۇرگىنشىگە جول بەرمەسە جانە توقتاماسا، وعان ايىپپۇل سالىنادى. ەگەر جاياۋ جۇرگىنشى دە، كولىك قۇرالى دا ءبىر قيىلىسۋ ايماعىندا بولسا، بۇل اكىمشىلىك قۇقىق بۇزۋشىلىق بولىپ تىركەلەدى.

"ينتەللەكتۋالدى جۇيە جول ءجۇرىسى قاعيدالارىن بۇزۋدى تىركەپ قانا قويماي، جول-كولىك وقيعالارىنىڭ الدىن الىپ، ىقتيمال ءقاۋىپتى جۇرگىزۋشىلەردى انىقتايدى. جاڭاشىلدىقتاردىڭ ءبىرى – جاياۋ جۇرگىنشىلەردى وتكىزبەيتىن جۇرگىزۋشىلەردى تىركەۋ"، – دەلىنگەن حابارلامادا.

سونىمەن قاتار ينتەللەكتۋالدى جۇيە پيلوتتىق رەجيمدە جۇرگىزۋشى مەن كولىك قۇرالىنىڭ الدىڭعى ورىندىقتارىنىڭ جولاۋشىلارىندا بەكىتىلمەگەن قاۋىپسىزدىك بەلدىگى سياقتى بۇزۋشىلىقتاردى تىركەيدى.