بۇرىنعى McDonald's مەيرامحانالار جەلىسى قايتا اشىلدى
23 قاڭتاردان باستاپ الماتىدا بۇرىن McDonald's برەندىمەن جۇمىس ىستەگەن «Food Solutions KZ» جشس-نە تيەسىلى ءبىرقاتار مەيرامحانالار جۇمىسىن قايتا باستايدى. مەيرامحانا جابىلعانعا دەيىنگى بارلىق قىزمەتكەرلەردىڭ جۇمىس ورىندارى، جالاقىلارى جانە باسقا دا ەڭبەك شارتتارى تولىق ساقتالادى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
كومپانيانىڭ باسپا ءسوز قىزمەتىنەن حابارلاعانداي، جىلدام قىزمەت كورسەتەتىن مەيرامحانالاردىڭ اشىلۋى بىرتىندەپ جۇرگىزىلەدى، باستاپقى كەزەڭ ىشىندە الماتىدا 5 مەيرامحانا اشىلادى.
قازىرگى ۋاقىتتا دايىندىق جۇمىستارى اياقتالدى، مەيرامحانالار بارلىق قاجەتتى ءونىم كولەمىن الدى جانە رەسمي اشىلۋعا دايىن.
جابىلۋ ۋاقىتىنا دەيىن جۇمىس ىستەگەن مەيرامحانالارداعى بارلىق قىزمەتكەرلەردىڭ جۇمىس ورىندارى، جالاقىلارى جانە باسقا دا ەڭبەك شارتتارى تولىق ساقتالادى. مەيرامحانالاردىڭ جۇمىسى وسىعان دەيىن قابىلدانعان ساپا مەن قىزمەت كورسەتۋدىڭ بارلىق جوعارى ستاندارتتارىن، سونداي-اق بيزنەستى جۇرگىزۋدىڭ قۇندىلىقتارى مەن پرينسيپتەرىن ەسكەرە وتىرىپ جالعاسادى.
«بۇل — ءبىزدىڭ كومپانيا ومىرىندەگى جاڭا كەزەڭ. ءبىز قوناقتار ءۇشىن ءار قالادا ورنالاسقان مەيرامحانالاردىڭ ەسىگىن بىرتىندەپ اشپاقپىز. ءبىز قوعامدىق تاماقتانۋ يندۋسترياسىنداعى كوشباسشىلىق پوزيسيامىزدى ساقتاپ قالۋدى كوزدەيمىز. بىزگە قولداۋ كورسەتكەن قىزمەتكەرلەرىمىزگە، سەرىكتەستەرىمىزگە جانە مەملەكەتتىك ورگاندارعا شىنايى العىسىمىزدى بىلدىرەمىز. ازىرگە مەيرامحانالار اتاۋسىز اشىلادى، جاقىن ارادا ءبىز جاڭا اتىمىزدى جۇرتشىلىققا تانىستىرامىز»، - دەدى «Food Solutions KZ» ج ش س باس ديرەكتورى اسەت ماشانوۆ.