فەستيۆال داۋرەن قامشىبايەۆتىڭ بايقاۋدان تىس كورسەتىلەتىن دەبيۋتتىك كارتيناسى – «زەرە» ءفيلمىنىڭ ۇلتتىق پرەمەراسىمەن اشىلادى
2021 جىلدىڭ 30 قاراشاسى مەن 4 جەلتوقسانى ارالىعىندا الماتىدا IX حالىقارالىق «باستاۋ» ستۋدەنتتىك جانە دەبيۋتتىك فيلمدەر كينوفەستيۆالى وتەدى، دەپ حابارلايدى Almaty-akshamy.kz.
فەستيۆالدىڭ نەگىزگى ماقساتى – ەۋروپا مەن ازيانىڭ جاس كينەماتوگرافيستەرى اراسىندا ىنتىماقتاستىق ورناتۋ، ولاردىڭ جۇمىستارىن قولداۋ جانە ىلگەرىلەتۋ، ءتۇرلى جانرداعى كينوفيلمدەردى جاساۋعا دەگەن قىزىعۋشىلىقتى ارتتىرۋ. «باستاۋ» كينوفەستيۆالى جاس رەجيسسەرلەر مەن سەناريستەرگە ءوز جوبالارىن ىسكە اسىرۋ ءۇشىن بىرەگەي الاڭ بولىپ تابىلادى. «باستاۋدىڭ» كونكۋرستىق باعدارلاماسى 3 بولىمنەن تۇرادى: تولىقمەتراجدى فيلمدەر بايقاۋى – Bastau DEBUTS، قىسقامەتراجدى فيلمدەر بايقاۋى – Bastau SHORTS جانە دەرەكتى فيلمدەر بايقاۋى – Bastau DOCS.
فەستيۆال داۋرەن قامشىبايەۆتىڭ بايقاۋدان تىس كورسەتىلەتىن دەبيۋتتىك كارتيناسى – «زەرە» ءفيلمىنىڭ ۇلتتىق پرەمەراسىمەن اشىلادى. بۇعان دەيىن بۇل فيلم تەك برازيلياداعى São Paulo International Film Festival حالىقارالىق كينوفەستيۆالىنە قاتىسقان. كارتينادا باستى رولدەردە تانىمال جۇلدىزدار بەرىك ايتجانوۆ، مۇرات بيسەنبين، ادينا باجان جانە ولگا لاندينا وينايدى.
سونداي-اق، كونكۋرستان تىس ايجان قاسىمبەكتىڭ «وت» كارتيناسى كورسەتىلەدى. ءفيلمنىڭ الەمدىك پرەمەراسى جاقىندا عانا پۋسانداعى (وڭتۇستىك كورەيا) حالىقارالىق كينوفەستيۆالدە ءوتتى. سونىمەن قاتار، بيىل فيلم گەرمانياداعى Film Festival Cottbus جانە سينگاپۋرداعى Singapore International Film Festival كينوفەستيۆالدەرىنە قاتىستى. ال باستى ءرولدى سومداعان تولەپبەرگەن بايساقالوۆ سوچيدەگى X Russian British Sochi international film festival & Awards 2021 كينوفەستيۆالىندە جانە لوس-اندجەلەستەگى Asian World Film Festival كينوفەستيۆالىندە ەكى بىردەي ماراپاتتى جەڭىپ الدى.