الماتىدا ورتالىق ازيا مەن كاۆكاز وڭىرىندە تۇڭعىش يتالياندىق مادەنيەت ينستيتۋتى اشىلدى. ءىس-شاراعا الماتى قالاسى اكىمدىگىنىڭ، ديپلوماتيالىق كورپۋستىڭ، گەتە ينستيتۋتى مەن فرانسۋز اليانسىنىڭ، يتالياندىق قوعامداستىقتىڭ، جەرگىلىكتى بيزنەس پەن مادەنيەتتىڭ وكىلدەرى قاتىستى، دەپ حابارلايدى almaty-akshamy.kz
قازاقستان-يتاليا اراسىنداعى ديپلوماتيالىق قاتىناستىڭ ورناعانىنا 30 جىلدان اسقان، بۇگىندە ەلدەر اراسىندا ساياسي، ەكونوميكالىق جانە الەۋمەتتىك-مادەني ىنتىماقتاستىق تابىستى دامۋدا. ەلدەر مەن قالالاردىڭ جاقىنداسۋىنا اسەر ەتەتىن نەگىزگى فاكتورلاردىڭ ءبىرى ءوزارا مادەني بايلانىس.
مادەنيەت ينستيتۋتىنىڭ نەگىزگى ميسسياسى يتاليان ءتىلى مەن مادەنيەتىن ناسيحاتتاۋ، جاڭا شىعارماشىلىق تالانتتارعا نازار اۋدارۋ. ءوز قىزمەتى بارىسىندا جوو يتاليان ءتىلىن ۇيرەنۋگە جاردەمدەسەدى، يتالياندىق كىتاپتاردى باسىپ شىعارۋعا قولداۋ كورسەتەدى، كورمەلەر مەن فەستيۆالدار ۇيىمداستىرادى، مۋزىكا، بي، كينو، تەاتر، ادەبيەت جانە ت.ب. بايلانىستى ءىس-شارالاردى جوسپارلاۋدا جەرگىلىكتى مەكەمەلەرمەن ىنتىماقتاستىقتى جۇزەگە اسىرادى.
يتاليانىڭ سىرتقى ىستەر جانە حالىقارالىق ىنتىماقتاستىق مينيسترلىگى الەم بويىنشا 86 يتالياندىق مادەني ينستيتۋتتار جەلىسىن ۇيلەستىرىپ، باسقارادى. مۇنداي العاشقى ينستيتۋت 1922 جىلى پراگادا (چەحيا) اشىلدى. وسى وقۋ ورىندارىندا قۇرىلعان ساتتەن باستاپ 330 مىڭنان استام ستۋدەنت يتاليان ءتىلىن وقىدى.
الماتىداعى يتالياندىق مادەنيەت ينستيتۋتى يتاليا مەن قازاقستاننىڭ دوستاس حالىقتارى اراسىنداعى ىنتىماقتاستىقتى نىعايتۋعا ىقپال ەتەدى. مادەني ءوزارا ءىس-قيمىلدىڭ مىسالى رەتىندە نەاپولدە بيىل 15 قاراشادان باستاپ ءبىر اي بويى الماتى تاريحى مۋزەيىنىڭ «قازاقستان كوشپەندىلەرى: تاريحى مەن بۇگىنا» كورمەسى ءوتىپ جاتىر، وندا يتالياندىقتار ۇلى دالانىڭ تاريحىمەن جانە مادەنيەتىمەن تانىسا الادى.
