ءبىر اپتاعا سوزىلعان فەستيۆالگە كورەرمەن ىقىلاسى ەرەكشە بولدى
ارۋ قالا الماتىدا II حالىقارالىق «يسابەكوۆ الەمى» اتتى تەاتر فەستيۆالى ءوز مارەسىنە جەتتى. قازاقستان رەسپۋبليكاسىنىڭ كورنەكتى جازۋشى-دراماتۋرگى، مەملەكەتتىك سىيلىقتىڭ يەگەرى دۋلات يسابەكوۆتىڭ 80 جىلدىق مەرەيتويىنا ارنالعان بۇل فەستيۆالگە 6 تەاتر ۇجىمى قاتىستى، دەپ حابارلايدى Almaty-akshamy.kz.
جازۋشىنىڭ مەرەيلى مەرەيتويىنا قازاقستان رەسپۋبليكاسىنىڭ مادەنيەت جانە سپورت ءمينيسترى داۋرەن ابايەۆ، الماتى قالاسىنىڭ اكىمى ەربولات دوسايەۆ جانە زيالى قاۋىم وكىلدەرى قاتىستى.
قالامگەر شىعارماشىلىعىنا ەرەكشە ىقىلاسىن بىلدىرگەن مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن قازاقستان رەسپۋبليكاسىنىڭ مادەنيەت جانە سپورت ءمينيسترى داۋرەن ابايەۆ وقىپ بەردى. وندا: «قۇرمەتتى دۋلات يسابەك ۇلى! ءسىزدى مەرەيتويىڭىزبەن قۇتتىقتايمىن! حالقىمىز ءوزىڭىزدى قازاق ادەبيەتىنىڭ كوش كەرۋەنى ىلگەرى باسۋىنا سۇبەلى ۇلەس قوسىپ كەلە جاتقان كورنەكتى قالامگەر رەتىندە جاقسى بىلەدى جانە قادىرلەيدى. ءسىزدىڭ قالامىڭىزدان شىققان تارتىمدى تۋىندىلار ۇلتتىق رۋحاني مادەني قازىنامىزدى بايىتا ءتۇستى. شىناي ءومىردى ارقاۋ ەتكەن شىعارمالارىڭىز نەگىزىندە تۇسىرىلگەن كوركەم فيلمدەر تالعامى بيىك كورەرمەندەردىڭ جوعارى باعاسىنا يە بولدى. قازاق دراماتۋرگياسىنىڭ وركەندەۋىنە سىڭىرگەن ەڭبەگىڭىز دە وتە مول. زاماننىڭ تىنىس-تىرشىلىگىن ايشىقتاپ كورسەتە بىلگەن پەسالارىڭىز ەلىمىز بەن الەم تەاترلارىنىڭ ساحنالارىندا تۇراقتى قويىلىپ كەلەدى. ءاردايىم ونەگەلى ءومىر جولىڭىزبەن كەيىنگى تولقىنعا ۇلگى كورسەتىپ، قولعا العان ىستەرىڭىز ءساتتى جۇزەگە اسا بەرۋىنە تىلەكتەستىك بىلدىرەمىن. سىزگە زور دەنساۋلىق، وتباسىڭىزعا باق-بەرەكە تىلەيمىن»، دەلىنگەن.
فەستيۆال بارىسىندا تۇركيا، گرۋزيا، اۆستراليا جانە ەلىمىزدىڭ رەسپۋبليكالىق، وبلىستىق تەاتر ۇجىمدارى جازۋشى شىعارمالارى بويىنشا قويىلعان سپەكتاكلدەردى ساحنالاۋدان ءوزارا سايىسقا تۇسكەن بولاتىن. ءبىر اپتاعا سوزىلعان فەستيۆالگە كورەرمەن ىقىلاسى ەرەكشە بولدى. ونەر ۇجىمدارى جازۋشىنىڭ «بورتە»، «اكتريسا»، «ءجۇز جىلدىق ماحاببات» جانە «مۇراگەرلەر» سىندى تۋىندىلارىن ساحنالادى. اتالعان سالا مايتالماندارىنىڭ سوزىنشە، قازاق دراماتۋرگىنىڭ ەڭبەگىنە شەتەلدىكتەردىڭ قىزىعۋشىلىق تانىتۋى بەكەر ەمەس.