الماتىدا ءىرى ۇرلىقتىڭ بەتى اشىلدى

الماتىدا اتەلەدەن 5 ملن تەڭگەنىڭ مۇلكى قولدى بولعان. 

اۋەزوۆ اۋداندىق پوليسياسىنىڭ مالىمەتىنشە، رايىمبەك داڭعىلىندا ورنالاسقان اتەلەدەن شامامەن 5 ميلليون تەڭگەنىڭ مۇلكى ۇرلانعان، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«قىلمىس كۇندىز، ساعات 10:00-دەن 12:00-گە دەيىنگى ارالىقتا ورىن العان. بەلگىسىز ادام ەركىن تۇردە كەڭسەگە كىرىپ، سول جەردەن مۇلىكتى ۇرلاپ، جالپى سوماسى 4 ملن 700 مىڭ تەڭگە ماتەريالدىق شىعىن كەلتىرگەن. اتالعان دەرەك بويىنشا قىلمىستىق ءىس ق ر قك-نىڭ 188-بابى 3-بولىگىمەن سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. بۇل قىلمىستى اشۋ ماقساتىندا جەدەل تەرگەۋ توبى قۇرىلدى. كۇدىكتىلەر پوليسيانىڭ ارنايى جاساعىنىڭ كومەگىمەن جۇرگىزىلگەن ارنايى ءىس-شارانىڭ ناتيجەسىندە قالاداعى بازارلاردىڭ بىرىندە ۇستالدى»، – دەدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.

كۇدىكتىلەردىڭ ەكەۋى دە - تۇركىستان جانە الماتى وبلىستارىنان كەلگەندەر. ولاردىڭ جاسى 25 پەن 29-دا. ءقازىر كۇدىكتىلەردىڭ جەكە باسى باسقا دا قىلمىستارعا قاتىسى بار-جوعىنا تەكسەرىلۋدە.