الماتىدا ءىرى تۇرعىن ءۇي كەشەنىنىڭ قۇرىلىسى كەزىندە ساۋلەت نورمالارى بۇزىلعان

ساۋلەت نورمالارى

الماتى قالاسىنىڭ بوستاندىق اۋدانىندا ءىرى تۇرعىن ءۇي كەشەنىنىڭ قۇرىلىسى كەزىندە ساۋلەت نورمالارى بۇزىلدى. بۇل تۋرالى الماتى قالالىق پروكۋراتۋراسىنان ءمالىم ەتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
الماتى قالاسىنىڭ پروكۋراتۋراسى بوستاندىق اۋدانى، ساتپايەۆ كوشەسى 26/4 مەكەن جايىندا ورنالاسقان ءىرى تۇرعىن ءۇي كەشەنىنىڭ قۇرىلىسى كەزىندە ساۋلەت نورمالارىنىڭ بۇزىلعانىن انىقتادى.
پروكۋراتۋرانىڭ مالىمەتىنشە، قاداعالاۋ ورگانى ەسكيزدىك جوبادا حالىق پەن قۇرىلىس سالۋ تىعىزدىعىنىڭ رۇقسات ەتىلگەن پارامەترلەرى بويىنشا نورمالاردان اسقانىن، الەۋمەتتىك وبەكتىلەر مەن ءبىلىم بەرۋ وبەكتىلەرىنە جۇكتەمەنىڭ تۋىنداۋى مۇمكىن ەكەندىگىنە ءتيىستى باعا بەرىلمەگەنىن، بۇل بالاباقشالار مەن جالپى ءبىلىم بەرەتىن مەكتەپتەردىڭ تاپشىلىعىنا الىپ كەلەتىنىن انىقتادى.

«بيىلعى 18 تامىز كۇنى بوستاندىق اۋدانى پروكۋراتۋراسىنىڭ ەسكيزدىك جوبانى كەلىسۋ بويىنشا ۋاكىلەتتى ورگاننىڭ ىس-ارەكەتىن زاڭسىز دەپ تانۋ تۋرالى تالاپ ارىزى سوت شەشىمىمەن تولىق كولەمدە قاناعاتتاندىرىلدى. قازىرگى ۋاقىتتا اتالعان ۋچاسكەدە بۇزۋشىلىقتار تولىق جويىلعانعا دەيىن الدىن الا قۇرىلىس جۇمىستارى توقتاتىلدى. شەشىم زاڭدى كۇشىنە ەنگەن جوق»، - دەپ حابارلادى پروكۋراتۋرادا.
ايتا كەتەيىك، جوعارىدا اتالعان اۋماقتا قۇرىلىس سالۋشى «Bi-RealtyAlmaty» ج ش س بولىپ تابىلادى.