بۇل تۋرالى الماتى قالاسىنىڭ وكق الاڭىندا ەسىرتكى قىلمىسىمەن كۇرەس ماسەلەلەرى جانە مۇنداي قۇقىق بۇزۋشىلىقتاردىڭ الدىن الۋ شارالارىنا ارنالعان بريفينگ بارىسىندا بەلگىلى بولدى، دەپ حابارلايدى almaty-akshamy.kz
“ناركوستوپ” جوباسىنىڭ جەتەكشىسى نۇرجان جاكۋپوۆتىڭ ايتۋىنشا، كيبەرۆولونتەردىڭ مىندەتى – تىيىم سالىنعان پرەپاراتتاردى جارنامالاۋ بەلگىلەرى بار سىلتەمەلەر مەن حابارلاندىرۋلاردى انىقتاۋ جانە بۇل اقپاراتتى قۇقىق قورعاۋ ورگاندارىنا بەرۋ.
«دامىعان تەحنولوگيا داۋىرىندە ەسىرتكىنىڭ تارالۋى، ونىڭ ىشىندە الەۋمەتتىك جەلىلەر ارقىلى دا ورىن الۋدا. ءتىپتى Facebook جەلىسىندە ەسىرتكى ساتاتىن دۇكەننىڭ جارناماسى بار سكرينشوتتاردى بىزگە جىبەرگەن بولاتىن. ءقازىر ءارتۇرلى سايتتار ارقىلى جاستاردى ەسىرتكىنى تاراتۋعا تارتۋ جاعدايلارى ءجيى كەزدەسەدى. بۇل قالاي بولادى؟ الدىمەن ايلىعى جوعارى كۋرەر جۇمىسىنا حابارلاندىرۋ ىلىنەدى. ادەتتە مۇنداي بوس جۇمىس ورىندارى ستۋدەنتتەرگە قولايلىراق. جۇمىس بەرۋشىمەن بايلانىس ورناعان سوڭ، ەسىرتكى دۇكەندەرىنىڭ كۋراتورلارى جۇمىستىڭ ءمانى كۋرەردىڭ ادەتتەگى جۇمىسىنان ءسال وزگەشە ەكەنىن جانە بۇل ەسىرتكىنىڭ تارالۋىن قامتيتىنىن ايتادى. سوسىن جۇمىسقا پوليسيا ارالاسادى، ولار ءوز كەزەگىندە تەرگەۋ جۇرگىزىپ، قۇقىق بۇزۋشىلاردى جاۋاپقا تارتادى»، - دەدى ول.
بولاشاق كيبەر-ۆولونتەرلەرگە ارنالعان كۋرستى ازىرلەۋشىلەردىڭ ايتۋىنشا، بۇل ءۇشىن ارنايى داعدىلار قاجەت ەمەس. كيبەر-ۆولونتەر بولۋ ءۇشىن “ناركوستوپ” جوباسىنىڭ الەۋمەتتىك جەلىدەگى @narkostopkz پاراقشاسىنا جازساڭىز بولعانى.
«كۋرستا وقۋ قىسقا مەرزىمدە وتەدى. بۇل جۇمىس بەلگىلى ءبىر ۋاقىتتى ءبولۋدى تالاپ ەتپەيدى، ادام بەلگىلى ءبىر سىلتەمەلەردى باقىلاپ، انىقتاۋعا 5-10 مينۋت نەمەسە 2-3 ساعات بولە الادى. ال ءبىز ءوز كەزەگىمىزدە الىنعان اقپاراتتى ءارى قاراي تەرگەۋ ءۇشىن قۇقىق قورعاۋ ورگاندارىنا جىبەرەمىز»، - دەدى ن.جاقىپوۆ.
جاستار اراسىندا ەسىرتكى قىلمىسىنىڭ الدىن الۋ شارالارىنا قاتىستى “ناركوستوپ” جوباسىنىڭ ۆولونتەرلەرى الماتى پوليسياسىمەن بىرلەسىپ، ءبىرقاتار ءىس-شارالار وتكىزۋدە. قالا قابىرعالارىنداعى جارنامالاردى بوياۋمەن قاتار، مەكتەپ وقۋشىلارى، كوللەدج جانە ۋنيۆەرسيتەت ستۋدەنتتەرى مەن ولاردىڭ اتا-انالارى ءۇشىن ارنايى دارىستەر وتكىزىلەدى. وسى جانە باسقا دا كوپتەگەن شارالارعا 3000-نان استام ادام قاتىستى.
“بيىل پوليسيا دەپارتامەنتىمەن بىرلەسە وتىرىپ، 100 مىڭنان استام قابىرعالارداعى جارنامانى بويادىق. وسىعان ۇقساس 200-دەن استام ءىس-شارا وتكىزىلدى. سونىمەن قاتار، ءبىز ينتەرنەتتە جانە تەلەديداردا ەسىرتكىگە قارسى كونتەنت دايىندادىق. قازاق تىلىندە ەسىرتكىنىڭ زيانى تۋرالى اقپارات از ەكەنىن ەسكەرىپ، وسى ماسەلەگە كوڭىل بولدىك»، - دەپ اتاپ ءوتتى “ناركوستوپ” جوباسىنىڭ جەتەكشىسى.
ءوز كەزەگىندە الماتى قالاسى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ اعا جەدەل ۋاكىلى، پوليسيا مايورى كوبەيەۆ داۋرەن حابارلاعانداي، قالادا جوسىقسىز فارماسيەۆتتەر اراسىندا ىزدەستىرۋ شارالارى جۇرگىزىلۋدە.
«وسى اپتادا مەديسينالىق، ەسىرتكىلىك، پسيحوتروپتىق زاتتاردىڭ، سونداي-اق پرەكۋرسورلاردىڭ تارالۋىن بولدىرماۋعا باعىتتالعان «دارمەك» وقۋ-وندىرىستىك ءىس-شارالارى وتكىزىلۋدە. جەدەل ىزدەستىرۋ شارالارى فارماسيەۆتيكالىق باقىلاۋ قىزمەتىمەن بىرلەسىپ جۇرگىزىلەدى. سونداي-اق، اعىمداعى جىلدىڭ ناۋرىز ايىندا «ترامادول» دارى-دارمەكتىڭ جيىنتىق كەستەسىنە ەنگىزىلگەنىن، ياعني تەگىن الۋعا بولاتىنىن، ءتىپتى دارىگەردىڭ رەسەپتىمەن ونى جاي عانا ساتۋعا بولمايتىنىن اتاپ وتكەن ءجون»، - دەپ تۇيىندەدى ءسوزىن د.كوبەيەۆ.