الماتىدا ينتەرنەت-الاياقتىق جاساۋ ءۇشىن قولدانىلعان ارنايى قۇرال-جابدىق انىقتالدى، – دەپ حابارلايدى aqshamnews.kz.
الماتى قالاسى پد كيبەرقىلمىسقا قارسى ءىس-قيمىل باسقارماسىنىڭ قىزمەتكەرلەرى، ق ر ءىىم كقد، قالالىق پروكۋراتۋرانىڭ ۇيلەستىرۋىمەن، سونداي-اق ۇقك اۋماقتىق بولىمشەسى جانە بايلانىس وپەراتورىمەن ءوزارا ىقپالداستىقتا ينتەرنەت-الاياقتىق جاساۋ ءۇشىن قولدانىلعان "Sim-box" تيپتەس ارنايى قۇرال-جابدىقتى انىقتاپ، تاركىلەدى. جەدەل ءىس-شارالار بارىسىندا زاڭسىز ترافيك ۇيىمداستىرعان ەكى جاس ازامات ۇستالدى.
– ءبىز تەلەكوممۋنيكاسيالىق جابدىقتى پايدالانا وتىرىپ جاسالاتىن قىلمىستىق سحەمالاردى انىقتاۋ جانە جولىن كەسۋ بويىنشا جۇيەلى جۇمىستى جالعاستىرۋدامىز. باستى مىندەتىمىز – زاڭسىز ترافيك ارنالارىنا دەر كەزىندە توسقاۋىل قويۋ، كيبەرقىلمىسكەرلەردىڭ ارەكەتىنە بوگەت جاساۋ جانە ازاماتتاردىڭ قاۋىپسىزدىگىن قامتاماسىز ەتۋ. سەرىكتەس قۇرىلىمدارمەن ءوزارا ءىس-قيمىل مۇنداي قاۋىپتەردى ءتيىمدى انىقتاۋعا جانە بەيتاراپتاندىرۋعا مۇمكىندىك بەرەدى، – دەدى الماتى قالاسى پد كيبەرقىلمىسقا قارسى ءىس-قيمىل باسقارماسى باستىعىنىڭ ورىنباسارى ەركەبۇلان قويشىبايەۆ.
اتالعان دەرەك بويىنشا قىلمىستىق ءىس قوزعالدى. ساراپتامالار تاعايىندالدى. قۇقىققا قايشى ارەكەتتىڭ بارلىق جاي-جاپسارىن جانە وعان قاتىسى بار تۇلعالاردى انىقتاۋعا باعىتتالعان تەرگەۋ ارەكەتتەرى جۇرگىزىلىپ جاتىر. پوليسيا دەپارتامەنتى كيبەرالاياقتىق – ەڭ كەڭ تارالعان قىلمىس تۇرلەرىنىڭ ءبىرى ەكەنىن ەسكە سالادى جانە ونى توتەنشە نەگىزدە توقتاتۋ جۇمىستارى تۇراقتى تۇردە جالعاساتىنىن حابارلايدى