الماتىنىڭ كريمينالدىق پوليسياسىنىڭ مالىمەتىنشە، وتكەن جىلدىڭ قورىتىندىسى بويىنشا ينتەرنەت-الاياقتىق 12 پايىزعا ازايعان.
سونداي-اق الاياقتىقتىڭ بۇل ءتۇرىن انىقتاۋ كورسەتكىشى ايتارلىقتاي جاقساردى. وتكەن جىلى كيبەرنادزور اقپاراتتىق جۇيەسى ارقىلى ينتەرنەت-الاياقتىققا ىقپال ەتەتىن 746-دان استام رەسۋرس انىقتالدى جانە بۇعاتتالدى، دەپ حابارلايدى aqshamnews.kz Polisia.kz-كە سىلتەمە جاساپ.
سونىمەن قاتار ءجيى الاياقتاردىڭ قۇربانى بولاتىن قارت ادامدارمەن الدىن الۋ شارالارى جۇرگىزىلۋدە: پوليسيا قىزمەتكەرلەرى جادىنامالار تاراتىپ، الاياقتىقتىڭ جاڭا تۇرلەرى مەن ادىستەرى تۋرالى تۇسىندىرۋدە.
– وكىنىشكە قاراي، كيبەرقىلمىسكەرلەردىڭ زاماناۋي ادىستەرى ءبىزدى ينتەرنەتتەگى قىلمىسپەن كۇرەسۋ ءۇشىن جەدەل جانە الدىن الۋ شارالارىن قابىلداۋعا مىندەتتەيدى. وسىعان وراي، وتكەن جىلى پوليسيا دەپارتامەنتىندە «كيبەرپول» بولىمشەسى قۇرىلىپ، ىت-تەحنولوگيالار سالاسىنداعى قىلمىستاردى اشۋ جۇمىسىن جالعاستىرۋدا، – دەدى، الماتى قالالىق پد كريمينالدىق پوليسيا باسقارماسىنىڭ باستىعى تالانت يسايەۆ.
الماتى قالالىق پوليسياسى تاعى دا ازاماتتاردى جەكە دەرەكتەرىنە قاتىستى ءتارتىپتى ساقتاۋعا شاقىرادى: ەشكىمگە جەكە مالىمەتتەردى، تەلەفوندارىڭىزدىڭ قۇپيا سوزدەرىن نەمەسە كارتالارىڭىزدىڭ CVR كودتارىن بەرمەڭىز. ولاردى الاياقتار پايدالانۋى مۇمكىن. بانكتىڭ كەز كەلگەن قوڭىراۋىن، تۋىستارمەن بولعان كەز كەلگەن جاعداي قايتا تەكسەرىلۋى كەرەك.