ارىق جەلىلەرىن كەڭەيتۋ، كوللەكتورلاردى قايتا قۇرۋ جانە قالپىنا كەلتىرۋ جوسپارلانعان
الماتىدا 36 سۋ تارتۋ نىسانى بار، ونىڭ 13ء-ى يەسىز قالعان، دەپ حابارلايدى Almaty-akshamy.kz Inform.kz-كە سىلتەمە جاساپ.
«الماتىدا 153 سۋ نىسانى بار، ونىڭ ىشىندە 109 سۋ اعىنى جانە 44 سۋ قويماسى. ولاردىڭ جالپى ۇزىندىعى – 586،2 شاقىرىم. سونداي-اق، قالا اۋماعىنداعى سۋ وبەكتىلەرىندە 36 سۋ تارتۋ نىسانى بار، ونىڭ 13ء-ى يەسىز، ونى ءورت ءسوندىرۋ جانە سۋارۋ ماشينالارى ءۇشىن دە پايدالانىلادى»، - دەيدى ەكولوگيا جانە قورشاعان ورتانى قورعاۋ باسقارماسى باسشىسى ورىنباسارىنىڭ مىندەتىن اتقارۋشى سەرگەي گەراسيمەنكو.
سونىمەن قاتار، ول كوكتەمگى كەزەڭدە سۋ باسۋ ايماقتارىنىڭ كوبەيگەنىن اتاپ ءوتتى.
«كوكتەمگى كەزەڭدە سۋ باسۋ ايماقتارىنىڭ سانى 102-گە دەيىن ارتتى. زەرتتەۋ بارىسىندا سۋ باسۋ ايماعىندا 82 اۋلا، 90 اكىمشىلىك عيمارات، 48 ساۋدا نۇكتەسى مەن وندىرىستىك عيماراتتار، سونداي-اق ساياباق پەن 50-دەن استام كوشە بار ەكەنى انىقتالدى»، - دەدى سپيكەر.
ايتۋىنشا، ماسەلەنى جەدەل شەشۋ ءۇشىن جىل سوڭىنا دەيىن ارىق جەلىلەرىن كەڭەيتۋ، كوللەكتورلاردى قايتا قۇرۋ جانە قالپىنا كەلتىرۋ جوسپارلانعان. بۇل 56 سۋ باسۋ ايماعىن جويۋعا مۇمكىندىك بەرەدى.
«سونىمەن قوسا، 2023 جىلدىڭ سوڭىنا دەيىن ۇزىندىعى 376 شاقىرىم ارىق جەلىلەرىن جاڭارتۋ جانە سالۋ جوباسى اياسىندا قالعان 46 سۋ باسقان ايماقتىڭ ماسەلەلەرى شەشىلىپ، 67 شاقىرىمدىق قۇرىلىس اياقتالادى. جاڭا ارىق جەلىلەرى دە قامتاماسىز ەتىلەدى. بۇگىندە قالانىڭ باتىس بولىگىندە، ۇزىندىعى 119 شاقىرىمدى قالپىنا كەلتىرۋ جۇمىستارى باستالىپ، شىعىس جانە ورتالىق بولىكتە جۇمىستاردى بيىلعى كۇزدە باستاۋ جوسپارلانىپ وتىر»، - دەدى ول.
سونداي-اق، ول جاسىل جەلەكتى سۋارۋدىڭ كەشەندى سحەماسىن ۇيىمداستىرۋ ماقساتىندا ارىق جەلىلەرىنە سۋ بەرەتىن 27 تارتۋ قۇرىلىسىن قايتا جاساقتاۋ جانە سالۋ بويىنشا جوبا ازىرلەنگەنىن جەتكىزدى.