الماتىداعى ساحا (ياكۋتيا) رەسپۋبليكاسىنىڭ كۇندەرى اياسىندا ىقىلاس اتىنداعى حالىق مۋزىكالىق اسپاپتار مۋزەيىندە ياكۋتيا حالىقتارىنىڭ مۋزىكا جانە فولكلورى مۋزەيىنىڭ «عاسىرلار ءۇنى» جىلجىمالى كورمەسى اشىلدى.
العاش رەت ياكۋتيانىڭ XX-XXI عع. ايگىلى شەبەرلەرىنىڭ قولىنان شىققان ىشەكتى، ىشەكتى-ىسپالى، ۇرمالى، شۋلى اسپاپتارى كەلۋشىلەر نازارىنا ۇسىنىلدى. سونداي-اق كورمە ءداستۇرلى ياكۋت ءادىسى بويىنشا اعاش، جانۋارلاردىڭ تەرىسى، ءمۇيىزى، تۇياعى سىندى تابيعي ماتەريالداردان جاسالعان ينتەراكتيۆتى شۋلى، ۇرمالى مۋزىكالىق اسپاپتارمەن تولىقتىرىلدى.
كورمەنىڭ اشىلۋىندا ساحا حالىقتارىنىڭ مۋزىكالىق اسپاپتارى مەن شەبەرلەرى جايلى لەكسيا جانە مۋزەيلىك فيلم كورسەتىلدى. مۋزەيگە كەلۋشىلەردىڭ ينتەراكتيۆتى مۋزىكالىق اسپاپتاردى ۇستاپ كورۋى جانە ولاردا ويناپ كورۋ مۇمكىندىگىنە يە بولۋى ەرەكشە قىزىعۋشىلىق تۋدىرادى.
ءىس-شارانىڭ رەسمي بولىمىندە ساحا رەسپۋبليكاسى مادەنيەت جانە رۋحاني دامۋ ءمينيسترى افاناسيي نويەۆ ىقىلاس اتىنداعى حالىق مۋزىكالىق اسپاپتار مۋزەيىنە سيكسير، ۇرۋعا ارنالعان تاياقشالارى بار كيۋپسيۋر، دجاگا، ىتىگىيا، حومۋس جانە كىرىمپا كىل كىلىھاح اسپاپتارىن سىيعا تارتتى.
سالتاناتتى ءىس-شارادان كەيىن مۋزەي ساحناسىندا ياكۋت حالىق شەبەرى، مادەنيەت ۇزدىگى، «كىل ساحا» ءانسامبلىنىڭ مۇشەسى رۋسلان گابىشيەۆپەن ارت-كەزدەسۋ جانە قازاقستان، قىرعىزستان جانە ياكۋتيالىق ءداستۇرلى جانر ورىنداۋشىلارى قاتىسقان الەم ەپوستارىنىڭ كەزدەسۋ كەشى وتكىزىلدى.
«ەل مۋزەيلەرىنىڭ دامۋى، ءىرى كولەمدى جوسپارلاردىڭ جۇزەگە اسىۋ ءوزارا ءتيىمدى ىنتىماقتاستىققا تىكەلەي بايلانىستى ەكەنىن اتاپ وتكىم كەلەدى. ءبىز قالىپتاسقان سەرىكتەستىك قارىم-قاتىناستى جوعارى باعالايمىز جانە الداعى ارەكەتتەستىگىمىز ساحا رەسپۋبليكاسى مەن قازاقستان رەسپۋبليكاسىنىڭ مادەني بايلانىستارىنىڭ نىعايۋىنا ىقپال ەتەدى دەپ سەنەمىز. ياكۋتيا حالىقتارىنىڭ مۋزىكاسى جانە فولكلورى مۋزەيى مەن كوشپەلى مۋزەي كومانداسىنا ساتتىلىك تىلەي وتىرىپ، ساحا حالقىنىڭ ءداستۇرلى ونەرىن ساقتاۋ جانە ناسيحاتتاۋ جولىندا وركەندەۋ مەن تولاعاي تابىستار تىلەيمىز»، – دەپ اتاپ ءوتتى كورمەنىڭ اشىلۋ سالتاناتىندا الماتى قالاسى مادەنيەت باسقارماسىنىڭ باسشىسى عاني مايلىبايەۆ.
