الماتىدا ايەلدەر مەن بالالاردىڭ ءال-اۋقاتىن باعالاۋ ءۇشىن مۋلتيينديكاتورلىق كلاستەرلىك زەرتتەۋ (MICS) باستالدى.
الماتىدا ساۋالناماعا 1536 ءۇي شارۋاشىلىعى قاتىسادى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگىنىڭ الماتى قالاسى بويىنشا ۇلتتىق ستاتيستيكا بيۋروسى دەپارتامەنتىنىڭ باسشىسى دارحان يسايەۆ مالىمدەدى، دەپ حابارلايدى aqshamnews.kz
سپيكەردىڭ ايتۋىنشا، ق ر ۇلتتىق ستاتيستيكا بيۋروسى يۋنيسەف-پەن بىرلەسىپ، 2024 جىلعى 2 قىركۇيەكتەن باستاپ قازاقستاندا حالىقارالىق مۋلتيينديكاتورلىق كلاستەرلىك زەرتتەۋ (MICS) جۇرگىزۋدى باستادى، ول ەلدىڭ 20 ءوڭىرىن قامتيدى.
MICSء-تىڭ نەگىزگى ماقساتى – ايەلدەر مەن بالالاردىڭ دەنساۋلىعى مەن ءال-اۋقاتىن باعالاۋ جانە مەملەكەتتىك ساياساتتىڭ تيىمدىلىگىن ارتتىرۋ ءۇشىن ماڭىزدى دەرەكتەردى جيناۋ. ساۋالناما دەنساۋلىق ساقتاۋ، تاماقتانۋ، ءبىلىم بەرۋ، بالالاردىڭ دامۋى ماسەلەلەرىن قامتيدى، سونىمەن قاتار پسيحيكالىق دەنساۋلىق، جۇمىسپەن قامتۋ، نەكە جانە ءومىردىڭ باسقا دا ماڭىزدى اسپەكتىلەرى قاراستىرىلادى.
«دالالىق جۇمىستار باستالماس بۇرىن ساۋالناما الاتىندارعا ارنالعان وقىتۋ سەمينارى وتكىزىلدى، وندا ماماندار ساۋالناما جۇرگىزۋگە دايىندالدى. ۇلتتىق جانە حالىقارالىق ساۋالنامالاردا تاجىريبەسى بار سۇحبات بەرۋشىلەر ءۇي شارۋاشىلىقتارى، ايەلدەر، ەرلەر جانە ءارتۇرلى جاستاعى بالالار ءۇشىن بەس نەگىزگى ساۋالنامانى پايدالانادى. بارلىق ساۋالنامالار مەملەكەتتىك ورگاندارمەن كەلىسىلدى»، – دەدى د.يسايەۆ.
ءار ساۋالناما تۇرمىس پەن دەنساۋلىقتىڭ ءتۇرلى اسپەكتىلەرىن قامتيدى:
- ءۇي شارۋاشىلىعىنىڭ ساۋالناماسى؛
- ايەلدەرگە ارنالعان ساۋالناما؛
- ەرلەرگە ارنالعان ساۋالناما؛
- بەس جاسقا دەيىنگى بالالار تۋرالى ساۋالناما؛
- بەس جاستان ون جەتى جاسقا دەيىنگى بالالار تۋرالى ساۋالناما.
ساۋالناماعا ەرىكتى جانە جاسىرىن تۇردە قاتىسۋعا بولادى. ۇلتتىق ستاتيستيكا بيۋروسى ساۋالناماعا قاتىسقان ءۇي شارۋاشىلىقتارىن ەرەكشە فورماسى مەن بەلگىلەرى بار سۇحبات جۇرگىزۋشىلەردىڭ جۇمىسىنا تۇسىنىستىكپەن قاراۋعا شاقىرادى.
بارلىق دەرەكتەر تەك ستاتيستيكالىق ماقساتتار ءۇشىن پايدالانىلادى، ال قورىتىندى ەسەپ بيۋرو مەن يۋنيسەف سايتىندا جاريالانادى. بارلىق تۋىنداعان سۇراقتار بويىنشا 1446 ءنومىرى ارقىلى بيۋرونىڭ بايلانىس ورتالىعىنا حابارلاسۋعا بولادى.