الماتىدا حالىقارالىق قارتتار كۇنىن مەرەكەلەۋ اياسىندا قارتتار ايلىعى وتەدى

قارتتار ايلىعى شەڭبەرىندە الماتى قالاسىنىڭ بەلسەندى ۇزاق ءومىر ءسۇرۋ ورتالىعى زەينەتكەرلەرگە، ياعني ورتالىق قىزمەت الۋشىلارىنا ارناپ ءبىرقاتار ءىرى ءىس-شارالار ۇيىمداستىرادى:

• 1 قازان كۇنى ساعات 11:00-دە تۇڭعىش پرەزيدەنت ساياباعىنىڭ الدىندا قارتتار ايلىعىنىڭ اشىلۋى جانە 300-دەن استام ادامنىڭ قاتىسۋىمەن سكانديناۆيالىق سەرۋەندەۋ فەستيۆالى وتەدى. باعدارلامادا جاپپاي فلەشموب، كوماندالاردىڭ سكانديناۆيالىق سەرۋەندەۋ بويىنشا كورسەتىلىمدەرى، شىعارماشىلىق نومىرلەر جوسپارلانعان. الماتىنىڭ ءارتۇرلى اۋداندارىنان، سونىڭ ىشىندە الاتاۋ، بوستاندىق، اۋەزوۆ، جەتىسۋ، ناۋرىزباي جانە باسقا دا كوماندالار قاتىسادى.

• 1-4 قازان ارالىعىندا الماتى قالاسىنىڭ تاريحي مۋزەيىندە زەينەتكەرلەردىڭ شىعارماشىلىق جۇمىستارىنىڭ كورمەسى وتەدى. وندا 20-دان استام قىزمەت الۋشىنىڭ 90 تۋىندىسى ۇسىنىلادى.

• 4 قازان كۇنى ساعات 11:00-دە اۆات اۋىلىندا «ەگىن مەرەكەسى» اتتى كوشپەلى ءىس-شارا وتەدى. وعان 150-200 ادام قاتىسىپ، زەينەتكەرلەر كونسەرتى، «اگروكراۋدسورسينگ» بەلسەندىلەرىنىڭ ەڭبەكتەرىن ماراپاتتاۋ ءراسىمى، سونداي-اق «تابيعات سىيى» كورمەسى ۇيىمداستىرىلادى.

• 10 قازان ساعات 14:00-دە «اسىل قازىنام» ۇزاق ءومىر ءسۇرۋ فەستيۆالى وتەدى. ءىس-شارادا شىعارماشىلىق قويىلىمدار، فلەشموبتار، دەفيلە، دومبىرا وركەسترلەرى مەن سپورتتىق كورسەتىلىمدەر جانە زەينەتكەرلەردىڭ شىعارماشىلىق كورمەسى جوسپارلانعان. وعان 500 كورەرمەن مەن 150 قاتىسۋشى جينالادى.

• 18 قازاندا ساعات 11:00-دە اتاكەنتتە زەينەتكەرلەردىڭ قولونەر بۇيىمدارىنىڭ كورمە-جارمەڭكەسى وتەدى.

• 30 قازان ساعات 14:00-دە قارتتار ايلىعىنىڭ جابىلۋىنا وراي «مەنىڭ جىلدارىم – مەنىڭ بايلىعىم» اتتى ۇزاق ءومىر ءسۇرۋ بالى وتەدى. وندا زەينەتكەرلەردىڭ بي ۇجىمدارىنىڭ ونەرلەرى، «اسىل اجە» كەشكى كيىمدەر مەن ۇلتتىق كوستيۋمدەر شەرۋى وتەدى. بالعا 200-250 ادام قاتىسادى. ءىس-شارا ءال-فارابي اتىنداعى قازۇۋ-دە وتەدى.

سونىمەن قاتار، حالىقارالىق قارتتار كۇنى اياسىندا الماتىدا قارتتارمەن كەزدەسۋلەر، ەكسكۋرسيالار، تەاترلار مەن مۋزەيلەرگە تەگىن بارۋ، اكتەرلەر مەن شىعارماشىلىق ۇجىمداردىڭ ونەر كورسەتۋى ۇيىمداستىرىلادى. سونداي-اق، زەينەتكەرلەرگە زاڭگەرلىك كەڭەستەر، قارجىلىق ساۋاتتىلىق بويىنشا سەمينارلار وتكىزىلىپ، «60+ كاسىبي باعدار» اتتى ەڭبەك نارىعى جانە جۇمىسقا ورنالاسۋ مۇمكىندىكتەرى جايلى اقپارات بەرىلەدى.

ەستەرىڭىزگە سالا كەتەيىك، الماتى قالاسىنىڭ بەلسەندى ۇزاق ءومىر ءسۇرۋ ورتالىعى قارت ادامداردىڭ دەنساۋلىعىن قولداۋ، قولايلى ورتا قۇرۋ جانە اعا بۋىن وكىلدەرىنىڭ ءومىر ءسۇرۋ ساپاسىن ارتتىرۋ باعىتىندا جۇمىس ىستەيدى.

2024 جىلعى 1 قىركۇيەكتەگى مالىمەت بويىنشا ورتالىقتا 4899 زەينەتكەر تىركەلگەن، ولارعا 179 988 قىزمەت كورسەتىلگەن. ورتالىقتىڭ باس كەڭسەسى الماتى قالاسى، ماۋلەنوۆ كوشەسى، 46ا مەكەنجايىندا ورنالاسقان.