الماتىدا قارتتارعا ارنالعان ايلىق جالعاسىپ جاتىر.
جۇمىسپەن قامتۋ جانە الەۋمەتتىك باعدارلامالار باسقارماسى اعا بۋىن وكىلدەرىن قولداۋ، الەۋمەتتەندىرۋ جانە بەلسەندى ۇزاق ءومىر سالتىن قالىپتاستىرۋ ماقساتىندا كەڭ اۋقىمدى ءىس-شارالار ۇيىمداستىرىپ كەلەدى، - دەپ حابارلايدى Aqshamnews.kz.
اي باسىنان بەرى ءبىرقاتار ماڭىزدى ءىس-شارالار ءوتتى. ەڭ باستىسى، «بەلسەندى ۇزاق ءومىر ءسۇرۋ: تاجىريبە جانە دامۋ كەلەشەگى» اتتى حالىقارالىق فورۋمى. فورۋم الەۋمەتتىك قورعاۋ جانە بەلسەندى ۇزاق ءومىردى قامتاماسىز ەتۋ سالاسىندا قازاقستان مەن شەتەل ماماندارىنىڭ تاجىريبە الماسۋ الاڭىنا اينالدى. قاتىسۋشىلار يننوۆاسيا ەنگىزۋ، سالاارالىق ءوزارا ءىس-قيمىل، ستراتەگيالىق جوسپارلاۋ جانە قارتتاردى قولداۋ باعدارلاماسىن دامىتۋ ماسەلەلەرىن تالقىلادى.
بۇگىن، 10 قازاندا، ەكى ءىرى ءىس-شارا وتەدى: مەدەۋ اۋداندىق بولىمشەسىندە شىعارماشىلىق ۇجىمدار مەن اقىنداردىڭ قاتىسۋىمەن «قارتتارىم – اسىل قازىنام» اتتى پوەزيا كەشى وتەدى. سونداي-اق، ارداگەرلەر مەن قالانىڭ قۇرمەتتى زەينەتكەرلەرىن ۇلىقتاۋعا ارنالعان سالتاناتتى ءىس-شارا جانە كونسەرتتىك باعدارلاما ۇيىمداستىرىلادى.
2025 جىلى 15 قازاندا بۇۇ جانە ورتالىق ازيا ەلدەرىنىڭ وكىلدەرى قاتىساتىن حالىقارالىق سەمينار اياسىندا ماۋلەنوۆ كوشەسى، 46ا مەكەنجايىنداعى بەلسەندى ۇزاق ءومىر ءسۇرۋ ورتالىعىنا بارۋ جوسپارلانعان. باعدارلامادا قىزمەت الۋشىلاردىڭ شىعارماشىلىق كورمەسى، كونسەرتتىك باعدارلاما جانە قارتتارمەن جۇمىس تاجىريبەسىمەن الماسۋ قاراستىرىلعان.
15 قازاندا، مەدەۋ اۋداندىق بولىمشەسى مەن مەدەۋ اۋداندىق ارداگەرلەر كەڭەسى بىرلەسىپ، حالىقارالىق قارتتار كۇنىنە ارنالعان كونسەرتتىك باعدارلامانى وقۋشىلار سارايىندا وتكىزەدى.
17 قازاندا ساعات 15:00-دە «ارت-گالاكسي الما-اتا» ارت-گالەرەياسىندا (نازاربايەۆ داڭعىلى، 223) «مەنىڭ قازاقستانىم» اتتى كورمە اشىلادى. وندا ورتالىقتىڭ قىزمەت الۋشىلارىنىڭ شىعارماشىلىق جۇمىستارى قويىلادى. اشىلۋ الدىندا كونسەرتتىك باعدارلاما ۇيىمداستىرىلادى. كورمە 2025 جىلى 17 قاراشاعا دەيىن جالعاسىپ، شامامەن 120 قاتىسۋشىنىڭ جۇمىسى ۇسىنىلادى.
22 قازاندا ورتالىقتىڭ بولىمشەلەرىندە قازاقستان رەسپۋبليكاسى كۇنىنە ارنالعان مەرەكەلىك ءىس-شارالار وتەدى، سونىڭ ىشىندە «گۇلدەنە بەر، قازاق ەلى» كونسەرتى جانە «بالۋان شولاق» بولىمشەسىنىڭ ۇيىمداستىرۋىمەن وتەتىن شاحمات فەستيۆالى بار.
24 قازاندا بوستاندىق اۋداندىق بولىمشەسى ۇيىمداستىرعان «جاسا، قازاقستان!» اتتى مەرەكەلىك كونسەرت جانە توعىزقۇمالاق پەن شاحماتتان جارىس وتەدى.
ايلىقتىڭ قورىتىندىسى 2025 جىلى 30 قازاندا وتەتىن قارتتار فەستيۆالىمەن تۇيىندەلەدى. باعدارلامادا شىعارماشىلىق قويىلىمدار، فلەشموب، ءسان كورسەتىلىمى، شەبەرلىك دارىستەرى، دومبىرا وركەسترلەرى، بي جانە ۆوكال ۇجىمدارىنىڭ ونەرى، سونداي-اق زەينەتكەرلەردىڭ شىعارماشىلىق جۇمىستارىنىڭ كورمەسى بار. ءىس-شاراعا 150-دەن استام ورىنداۋشى قاتىسىپ، 500-دەن استام كورەرمەن كەلمەك.
اي بويى ورتالىقتىڭ بارلىق بولىمشەسىندە كەزدەسۋلەر، كونسەرتتەر، ەكسكۋرسيالار، شەبەرلىك دارىستەرى، سپورتتىق جانە مادەني ءىس-شارالار جالعاسىپ جاتىر. ءاربىر ءىس-شارادا بەلسەندى جانە تالانتتى قاتىسۋشىلار، شىعارماشىلىق ۇجىمدار مەن سپورتتىق كوماندالار ماراپاتتالۋدا.
ەسكە سالا كەتەيىك، «الماتى قالاسىنىڭ بەلسەندى ۇزاق ءومىر ءسۇرۋ ورتالىعى» كوممۋنالدىق مەملەكەتتىك مەكەمەسىنىڭ قىزمەتى اعا بۋىن وكىلدەرىنىڭ ءومىر ساپاسىن جاقسارتۋ مەن دەنساۋلىعىن نىعايتۋعا باعىتتالعان. كۇن سايىن ورتالىقتىڭ بولىمشەلەرىنە 500-دەن استام ادام كەلەدى. مۇندا 40-تان استام باعىت بويىنشا الەۋمەتتىك-ساۋىقتىرۋ، مادەني، ءبىلىم بەرۋ، قۇقىقتىق جانە وزگە دە قىزمەتتەر كورسەتىلەدى.