الماتى قالاسىندا جۇمىس بەرۋشىلەر مەن بولاشاعى جارقىن جاستاردىڭ باسىن قوسقان TalentforBIZ مانساپ جارمەڭكەسى ءوتتى.
قازاقستاندا وسىمەن ەكىنشى رەت ۇيىمداستىرىلعان جوبانى 2019 جىلدان باستاپ تۇركيا رەسپۋبليكاسىنىڭ پرەزيدەنتى جانىنداعى كادر باسقارماسى جۇزەگە اسىرىپ كەلەدى.
TalentforBIZ – وقۋ ءبىتىرىپ، قولىنا ديپلومىن العان جاس مامانداردى جۇمىسقا ورنالاستىرۋ مۇمكىندىكتەرىن ۇسىنىپ كەلە جاتقان اۋقىمدى ءىس-شارا. بۇل جوبا بەدەلدى تۇرىك كومپانيالارىنا الەمدىك دەڭگەيدە جۇمىس ىستەيتىن قازاقستاندىق جاستاردى ەكى ەلدە دە جۇمىسقا ورنالاستىرىپ، تاعىلىمدامادان ءوتۋ جانە ءبىلىم الۋ سياقتى ءارتۇرلى مانساپتىق مۇمكىندىكتەردى ۇسىنىپ وتىر. وسى ۋاقىتقا دەيىن الەمنىڭ 10 ەلىندە 15 رەت وتكەن شارا قازاقستاننان كەيىن وزگە دە حالىقارالىق ورتالىقتاردا جالعاسىن تابادى.
جارمەڭكەگە جيىرماعا جۋىق جۇمىس بەرۋشى قاتىستى. اتاپ ايتقاندا، Turkish Airlines، تۇرىك اەروعارىش ونەركاسىبى، Aselsan، Havelsan، Halk Bankası، Türk Telekom، سونداي-اق قازاقستاندا جۇمىس ىستەيتىن Abdi İbrahim، Esan Eczacıbaşı، Ziraat Bankası جانە Pro Yapı كومپانيالارى قاتىستى. كورمەگە كەلگەن جاس مامانداردىڭ قابىلەت-قارىمىن قاراپ، تۇيىندەمەسىن كورگەننەن كەيىن بوس جۇمىس ورنىن ۇسىندى.
تۇركيا رەسپۋبليكاسى پرەزيدەنت باسقارماسى مانساپ ورتالىعىنىڭ باسشىسى، دوسەنت، دوكتور ساليم التاي تۇركيادان ارنايى كەلىپ، قاتىستى. سونداي-اق، تۇركيانىڭ الماتى قالاسىنداعى باس كونسۋلى ەۆرەن مۇددەرەسوعلۋ جارمەڭكەگە قاتىسقان جۇمىس بەرۋشى مەكەمەلەرگە العىسىن ءبىلدىرىپ، جاستارعا ساتتىلىك تىلەدى.
«وسى شارانى 2019 جىلى ءدال وسى جەردە ۇيىمداستىرعان ەدىك. ول ۋاقىتتان بەرى الماتى قاتتى وزگەرگەن. ءبىزدىڭ ماقسات – قازاقستاندىق جاستاردى تۇركياعا نەمەسە باسقا ەلگە الىپ كەتۋ ەمەس. قازاقستان – ءبىزدىڭ اتاجۇرتىمىز، تۇركيا دا ەكىنشى وتانىمىز سانالادى. جاستار اراسىندا مادەني بايلانىستى دامىتۋ ءۇشىن ءارتۇرلى شارالار ۇيىمداستىرۋ كەرەك. بۇگىن كۇنى بويى كومپانيالار مەن جۇمىس بەرۋشىلەر سۇحباتتاسىپ،
ۇسىنىلعان بوس ورىندارمەن تانىسادى، ءوز تۇيىندەمەلەرىن قالدىرادى. ەكى تاراپقا دا پايدالى بولارىنا سەنەمىز»، - دەيدى ساليم التاي.
باس كونسۋل ەۆرەن مۇددەرەسوعلۋ دا قازاقستان مەن تۇركيا قوعامنىڭ بارلىق سالاسىندا، اسىرەسە، ءبىلىم بەرۋ، ساۋدا جانە ەكونوميكادا بەرىك بايلانىس ورناتقانىن ايتا كەلە، ەكونوميكا سالاسىنداعى ساۋدا كولەمى 1992 جىلى نەبارى 100 ميلليون دوللار قۇراسا، ال 2023 جىلدىڭ سوڭىندا 6 ملرد. دوللاردان اسقانىن مالىمدەدى.
«ەندىگى ماقسات – ەكىجاقسى ساۋدا كولەمىن قىسقا مەرزىم ىشىندە 10 ملرد. دوللارعا جەتكىزۋ.
اتالمىش جوبا جىل سايىن تۇراقتى تۇردە ۇيىمداستىرىلىپ، جاقسى ناتيجە كورسەتىپ كەلەدى. الەمنىڭ تۇكپىر تۇكپىرىنەن كەلگەن تالانتتى جاستارعا حالىقارالىق دەڭگەيدە جۇمىس ىستەيتىن تۇرىك كومپانيالارى تۋرالى اقپارات بەرۋ ءۇشىن وتكىزىلەدى. ءبىزدىڭ تانىمال جۇمىس بەرۋشى كومپانيالارمەن سۇحباتتاسىپ، جارنامالىق كەزدەسۋلەر ۇيىمداستىرىلادى. مەكەمەلەر بوس جۇمىس ورنىن ۇسىنىپ، جۇمىسقا ورنالاسۋعا جانە تاعىلىمداماعا وتىنىمدەر قابىلدايدى»، - دەدى باس كونسۋل.
مانساپ جارمەڭكەسىنە وزىنە لايىق جۇمىس ىزدەي كەلگەن ماديار
«جاقىندا تۇركيا ەلىنە بارىپ، التى اي تاجىريبە جيناپ كەلدىم. حالىقارالىق قاتىناستار ماماندىعىندا وقيمىن. سوندىقتان وسىنداي جارمەڭكەلەردىڭ قالامىزدا ءوتۋى مەن ءۇشىن ماڭىزدى. بۇل جەردە الەمدىك دەڭگەيدە تانىمال كومپانيالارمەن جاقىنىراق تانىسۋعا مۇمكىندىك الدىم. جۇمىس بەرۋشىلەردىڭ تالاپتارىن تىڭداپ، سۇحباتتاستىق. ازىرگە ەكى جۇمىس بەرۋشى مەكەمە كوڭىلگە قونىمدى»، - دەيدى تۇران ۋنيسەرسيتەتىنىڭ ستۋدەنتى ماديار ەرلان ۇلى.