الماتىدا Dedeman Hotels & Resorts International حالىقارالىق جەلىسىنىڭ زاماناۋي 4 جۇلدىزدى قوناق ءۇيى اشىلدى. Park Dedeman Almaty جوباسىنا 4 ملرد تەڭگەدەن استام جەكە كاپيتال تارتىلعان، دەپ حابارلايدى almaty-akshamy.kz
قالادا بارلىعى 2024-2027 جىلدارى پايدالانۋعا بەرىلەتىن 3287 ءنومىرى بار 23 جاڭا قوناق ءۇيدىڭ قۇرىلىسى جۇرگىزىلىپ جاتىر:
- 1067 بولمەلى 7 قوناق ءۇي – 2024 جىلى؛
- 930 بولمەلى 7 قوناق ءۇي – 2025 جىلى؛
- 746 بولمەلى 5 قوناق ءۇي – 2026 جىلى؛
- 544 بولمەلى 4 قوناق ءۇي – 2027 جىلى.
قالالىق تۋريزم باسقارماسى الماتىنىڭ ەلىمىزدىڭ ءىرى ىسكەرلىك جانە تۋريستىك ورتالىعى مارتەبەسىن كورسەتە وتىرىپ، قوناق ءۇي ينفراقۇرىلىمىنىڭ سانى مەن ساپاسى بويىنشا قازاقستاندا كوشباسشى ورىندا تۇرعانىن حابارلايدى. ۇلتتىق ستاتيستيكا بيۋروسىنىڭ مالىمەتىنشە، بىلتىرعى 9 ايدا الماتىعا 1،5 ملن.ادام كەلدى، ونىڭ 409،4 مىڭى شەتەلدىك تۋريست. بۇل رەتتە، تۋريستەردىڭ جالپى سانىنىڭ 60%-ى 4 جانە 5 جۇلدىزدى قوناق ۇيلەردە (246 256 ادام) تۇرۋدى ءجون كورەدى.
«جەلىلىك قوناقۇيلەردى تارتۋ الماتىنىڭ حالىقارالىق نارىقتاعى تۋريستىك دەستيناسيا رەتىندەگى جوعارى تارتىمدىلىعىن كورسەتەدى. نومىرلىك قوردىڭ ۇلعايۋى تۋريستەردىڭ مەگاپوليستە بولۋ ىڭعايلىلىعىن ارتتىرادى جانە ارينە، تۋريستىك سالانىڭ دامۋىنا وڭ اسەرىن تيگىزەدى. وسىعان بايلانىستى ءبىز شەتەلدىك تۋريستەرگە ارناپ ورنالاسۋ ورىندارىن ۇلعايتۋ جانە ولاردىڭ سانىن كوبەيتۋ بويىنشا جۇمىستى جالعاستىرامىز»، - دەدى الماتى قالاسى تۋريزم باسقارماسىنىڭ باسشىسى عاليا توقسەيىتوۆا.
ەستەرىڭىزگە سالا كەتەيىك، 2023 جىلى جەكە ينۆەستيسيالار ەسەبىنەن الماتى قالاسىندا 161 ورىنعا ارنالعان 4 نىسان اشىلدى: «Qazaq Auyl» مەيرامحانالىق كەشەنى بار ەكو-قوناق ءۇي - 16 ءۇي، «Grand Mildom» قوناق ءۇيى - 112 بولمە، «Medeu camp» -13 ماۋسىمدىق گلامپينگ، «Dami hotel» - 20 بولمە.
- الماتى قالاسىندا ءتۇرلى ساناتتاعى 345 قوناق ءۇي تىركەلگەن: 5* - 7 قوناق ءۇي (ۇلەسى – 2%)، 4* - 19 قوناق ءۇي (ۇلەسى – 5،5%)، 3* - 5 قوناق ءۇي (ۇلەسى – 1،4%)، ساناتسىز – 188 قوناق ءۇي (ۇلەسى – 54،5%)، باسقا دا تيپتەر (پانسيوناتتار، لاگەرلەر جانە ت.ب.) – 126 نىسان (ۇلەسى – 36،5%). الماتى قالاسىنىڭ نومىرلىك قورى 11 454 بىرلىك، قوناق ءۇي نىساندارىنىڭ ءبىرجولعى سىيىمدىلىعى 21،8 مىڭ ورىن.