دجازدى باعالايتىندار كوبەيگەن.
الماتىدا حالىقارالىق دجاز فەستيۆالى باستالدى. 24 ساۋىرگە دەيىن جالعاساتىن مادەني شاراعا يزرايل، فرانسيا، ۆەنگريانىڭ جانە وتاندىق دجاز جانرىنىڭ مۋزىكانتتارى قاتىسادى، دەپ حابارلايدى Almaty-akshamy.kz Almaty.tv.
ماسەلەن، العاشقى كۇنگى كونسەرت شىمىلدىعى يزرايل ونەرپازدارىنىڭ ورىنداۋىنداعى تۋىندىمەن اشىلدى. ساحنادا دجازسۇيەر قاۋىم اراسىندا كەڭىنەن تانىمال Guy Mintus تريوسى ونەر كورسەتىپ، كورەرمەندى ەرەكشە كۇيگە بولەدى. ايتا كەتۋ كەرەك، توپ ورىنداعان شىعارمالار تۇرىك ماقامى، ءۇندى ستيلىندە بىر-بىرىنە ۇقسامايدى.
«قازاقستاندا العاش رەت 3 جىل بۇرىن ونەر كورسەتتىم. مۇنداعى اۋديتوريا قاتتى ۇنايدى. جىلدا كەلۋگە دايىنبىز. بۇگىن كلاسسيكالىق دجاز اۋەنىن ورىندايمىز. سونداي-اق دجازعا يكەمدەلگەن كومپوزيسيا ۇسىنىلادى»، – دەدى «Guy Mintus» تريوسىنىڭ كوشباسشىسى گاي مينتۋس.
دجاز جانرى - ەلىمىزدە كەنجە دامىپ كەلە جاتقان ونەر ءتۇرى. ءىس-شارانىڭ ماقساتى – ەل اراسىندا، اسىرەسە، جاستارعا وسى مۋزىكا باعىتىن كەڭىنەن تاراتۋ، ناسيحاتتاۋ. فەستيۆال بارىسىندا شەتەلدىك تاجىريبەلى مۋزىكانتتار الماتى دجاز مەكتەبىندەگى وقۋشىلارعا ارناپ شەبەرلىك ساعاتىن وتكىزبەك. ۇيىمداستىرۋشىلار 20 جىلدىڭ ىشىندە جۇرتتىڭ دجازعا دەگەن قىزىعۋشىلىعى ارتقانىن ايتادى.
«ءيا، العاشقى جىلدارمەن سالىستىرعاندا دجازدى باعالايتىندار كوبەيگەن. قول شاپالاقتاپ، بىزبەن بىرگە ونەر كورسەتەدى. بارىنشا ەركىن تاماشالايدى. پاندەميا كەسىرىنەن فەستيۆال بىرنەشە جىل قاتارىنان وتپەي قالدى. شارانى ۇيىمداستىرۋعا قولداۋ كورسەتكەن الماتى اكىمدىگىنە راحمەت»، – دەدى «الماتى دجاز مەرەكەسى» فەستيۆالىنىڭ ۇيىمداستىرۋشىسى تاگير زاريپوۆ.