«حالىق قاتىساتىن بيۋدجەت» جوباسى اياسىندا جەرگىلىكتى بيۋدجەت قاراجاتى ەسەبىنەن قالالىق ورتانى دامىتۋ بويىنشا وتىنىمدەردى قابىلداۋ باستالدى.
30 ناۋرىزدى قوسا العاندا budget.open-almaty.kz ينتەرنەت-پورتال ارقىلى قالا تۇرعىندارى ءوز اۋدانىن (شاعىن اۋدان، اۋلا جانە ت.ب.) اباتتاندىرۋ بويىنشا جوبالىق ۇسىنىستارىن بەرە الادى، دەپ حابارلايدى Almaty-akshamy.kz.
جوبانىڭ كريتەرييلەرى مەن تالاپتارىنا سايكەس كەلەتىن، سونداي-اق داۋىس بەرۋ كەزەڭىندە الماتى تۇرعىندارىنىڭ ەڭ كوپ داۋىس جيناعان يدەيالارى مەن باستامالارىن اكىمدىك اعىمداعى 2023 جىلى ىسكە اسىراتىن بولادى. "حالىق قاتىساتىن بيۋدجەت" جوباسىن قارجىلاندىرۋدىڭ قوسىمشا سوماسى 7 ملرد تەڭگەنى قۇرايدى.
جوبالىق ۇسىنىستار مىناداي 9 سانات بويىنشا قابىلدانادى: كوگالداندىرۋ؛ تروتۋارلاردى جايلاستىرۋ؛ تروتۋارلاردى، پاندۋستاردى، ارىقتاردى سالۋ جانە جوندەۋ؛ جالپىعا ورتاق پايدالانىلاتىن ورىنداردى (ساياباقتاردى، سكۆەرلەردى، جاياۋ جۇرگىنشىلەر ايماقتارىن، كوشەلەردى جانە وزگە دە وبەكتىلەردى) قۇرۋ، جوندەۋ جانە جارىقتاندىرۋ؛ بورديۋرلەردى، توسەنىشتەردى، تىرەۋ قابىرعالارىن جوندەۋ؛ پوليگونداردى جويۋ؛ بالالار ويىندارى مەن ەرەسەك تۇرعىنداردىڭ دەمالىسىنا ارنالعان ورىندىقتاردى، ۋرنالاردى، جابدىقتار مەن كونسترۋكسيالاردى جالپى پايدالانىلاتىن ورىندارعا ورناتۋ جانە جوندەۋ؛ سپورت الاڭدارىن (ترەناجەر الاڭدارىن، فۋتبول، باسكەتبول، ۆولەيبول الاڭدارىن)، اۋلا اۋماقتارىندا جانە جالپى پايدالانىلاتىن ورىنداردا بالالار ويىن الاڭدارىن ورناتۋ، جوندەۋ جانە جارىقتاندىرۋ؛ سانيتاريانى قامتاماسىز ەتۋ.
جوبالىق ۇسىنىستار budget.open-almaty.kz. پورتالى ارقىلى قابىلدانادى، ول ءۇشىن ءوتىنىمدى (جوبالىق ۇسىنىستىڭ اتاۋى، ونىڭ سيپاتتاماسى، مەكەن-جايى/ورنالاسقان جەرى) تولتىرىپ، جوبالىق ۇسىنىستىڭ باعدارلى فوتوسۋرەتىن/نوبايىن/سحەماسىن جانە سمەتاسىن تىركەۋ قاجەت (ينتەرنەتتەن نەمەسە كەز كەلگەن باسقا اشىق كوزدەردەن ۇلگى نوبايلارعا نەمەسە ەسەپتەۋلەرگە جول بەرىلەدى). ءبىر جوبالىق ۇسىنىستىڭ ەڭ جوعارى قۇنى 86،2 ملن تەڭگەدەن (25 مىڭ اەك) اسپاۋعا ءتيىس.
بارلىق وتىنىمدەر قابىلدانعاننان كەيىن، ءاربىر اۋدان اكىمدىگى جانىنان ءماسليحات دەپۋتاتتارىنىڭ، الماتى قالاسىنىڭ قوعامدىق كەڭەس مۇشەلەرىنىڭ، ساۋلەتشىلەردىڭ، قۇرىلىس سالاسىنداعى مامانداردىڭ قاتىسۋىمەن ساراپتامالىق كەڭەستەر قۇرىلادى. باعالاۋ بارىسىندا ۇسىنىستار داۋىس بەرۋگە جىبەرىلۋى، پىسىقتاۋعا جىبەرىلۋى نەمەسە جوبالاردى ىرىكتەۋ كريتەرييلەرىنە سايكەس كەلمەۋىنە بايلانىستى قابىلدانباۋى مۇمكىن. ءاربىر جوبا بويىنشا اقپارات الدىن الا رۇقسات بەرۋ حاتتامالارىندا كورسەتىلەدى جانە اۋداندىق اكىمدىكتەر budget.open-almaty.kz. پورتالىندا جاريالايدى. پىسىقتاۋ قاجەت بولعان جاعدايدا، ۇسىنىس اۆتورىنا ەلەكتروندىق پوشتاعا حابارلاما جىبەرىلەدى. بۇدان ءارى، اۆتورلار پىسىقتاعان ۇسىنىستاردى قاراۋ ناتيجەلەرى بويىنشا اۋدان اكىمدىكتەرى budget.open-almaty.kz پورتالىندا رۇقسات حاتتامالارىن جاريالايدى.
جوباعا قاتىسۋشىلاردىڭ ىڭعايلىلىعى ءۇشىن پورتالدا "داۋىس بەرۋ" بولىمىندە ونلاين-داۋىس بەرۋ قولجەتىمدى، وندا سىزگە وزىڭىزگە ۇناعان 3-تەن اسپايتىن جوبالىق ۇسىنىستاردى تاڭداپ، ەسق نەمەسە جسن (SMS-كود) كومەگىمەن ءوز داۋىسىڭىزدى راستاۋعا بولادى. كەلەسى كەزەڭدە اۋدان اكىمدىگى داۋىس بەرۋ قورىتىندىلارىنىڭ حاتتاماسىن قالىپتاستىرىپ، پورتالدا ورنالاستىرادى، وندا جىبەرىلگەن جوبالاردىڭ سانى جانە ءاربىر جوبا بويىنشا داۋىس بەرگەن ازاماتتاردىڭ سانى تۋرالى تولىق اقپاراتتى كورسەتەدى. وسىدان كەيىن بيۋدجەتتىك زاڭناماعا سايكەس جوبالىق ۇسىنىستاردى ىسكە اسىرۋ بويىنشا بيۋدجەتتىك وتىنىمدەر قالىپتاستىرىلادى.
اۋداندىق اكىمدىكتەر جوبالىق ۇسىنىستاردى ىسكە اسىرۋ بارىسى جانە قورىتىندىلارى تۋرالى اقپاراتتى budget.open-almaty.kz پورتالىنداعى "جوبالار بويىنشا ماتەريالدار" بولىمىندە ورنالاستىرادى.
جوبالىق ۇسىنىس كريتەرييلەرى:
- ءبىر اۆتور – ءبىر ءوتىنىم – ءبىر جوبا؛
- نىسان قول جەتىمدىلىكتى شەكتەمەي، جالپى پايدالانۋدا بولۋى كەرەك؛
- وبەكتىنىڭ ورنالاسقان جەرى ونى ىسكە اسىرۋ جوسپارلانعان اۋدان اۋماعىندا، جالپى پايدالانۋ ۋچاسكەسىندە بولۋى ءتيىس؛
- اكىمدىك قۇزىرەتى شەگىندە بولۋى مىندەتتى؛
- الماتى تۇرعىندارى ءۇشىن وزەكتىلىگى.
جوبالىق ۇسىنىستار قابىلدانبايدى، ەگەر:
- قۇرىلىس-مونتاجداۋ جۇمىستارىن جۇرگىزبەستەن، تەك جوبالاۋ-سمەتالىق قۇجاتتامانى ازىرلەۋگە ەسەپتەلسە؛
- بولاشاقتا قوسىمشا ەلەمەنتتەردى ىسكە اسىرۋدى تالاپ ەتسە؛
- الماتىنىڭ دامۋ باسىمدىقتارىنا سايكەس كەلمەسە؛
- جەكە كوممەرسيالىق سيپاتقا يە بولسا جانە ت. ب.
ەستەرىڭىزگە سالا كەتەيىك، 2023 جىلى "حالىق قاتىساتىن بيۋدجەت" جوباسى بەسىنشى رەت جۇزەگە اسىرىلۋدا. الماتىدا العاش رەت ول 2019 جىلدىڭ تامىزىندا ىسكە قوسىلدى. 2022 جىلى 1251 ۇسىنىس كەلىپ ءتۇستى، ونىڭ 205ء-ى 2023 جىلى ىسكە اسىرۋعا ماقۇلداندى، جالپى سوماسى 8،5 ملرد تەڭگەنى قۇرايدى. 2022 جىلدىڭ ەڭ قىزىقتى جوبالارىنىڭ ىشىندە مىنالاردى اتاپ وتكەن ءجون:
- الماتى قالاسى جەتىسۋ اۋدانى، چەرنوۆيسكايا كوشەسىندەگى ەسەنتاي وزەنىنىڭ بويىنداعى جاعالاۋدى جايلاستىرۋ.
- المالى اۋدانىنداعى بوگەنباي باتىر بۋلۆارىن اباتتاندىرۋ (شاريپوۆودان بايتۇرسىنوۆقا دەيىن).
- مەدەۋ اۋدانىنداعى قادامداردى اعىمداعى جوندەۋ كەرەي جانىبەك حاندار كوشەسى، 29.
- مەدەۋ اۋدانىنداعى تيكساي وزەنىنىڭ جاعالاۋىن اباتتاندىرۋ.
المالى اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ "حالىق قاتىساتىن بيۋدجەت" باعدارلاماسىن ىسكە اسىرۋعا 2023 جىلى قوسىمشا 7 ملرد تەڭگە بولىنەتىنىن حابارلادى. بۇل شەشىم وسى باعدارلامانىڭ تيىمدىلىگىن ەسكەرە وتىرىپ قابىلداندى. قوسىمشا قاراجات قالانىڭ سەگىز اۋدانىنا بولىنەدى. جالپى، قارجىلاندىرۋ 1،8 ەسەگە ۇلعايتىلادى.
"حالىق قاتىساتىن بيۋدجەت" بويىنشا كونسۋلتاسيانى الماتى قالاسىنىڭ اۋداندىق اكىمدىكتەرىنەن، سونداي-اق الماتى اكىمدىگىنىڭ Open Almaty قوعامدىق قابىلداۋ بولمەسىنەن 224 39 29 (ىشكى.203)، 1308 الۋعا بولادى.