ع.مۇسىرەپوۆتىڭ مۋزەي-ۇيىندە الماتى قالاسى اكىمدىگىنىڭ قولداۋىمەن قازاق ادەبيەتىنىڭ كلاسسيگى، اكادەميك-جازۋشى عابيت مۇسىرەپوۆتىڭ «ەر انا» اتتى اڭگىمەلەر جيناعىنىڭ تانىستىرىلىمى ءوتتى.
“كىتاپ “Qasymkitap” باسپاسىنان 1000 دانا تارالىممەن جارىق كوردى. قۇراستىرۋشىسى – ءادىلعازى قايىربەكوۆ. جيناققا قالامگەردىڭ «بوراندى تۇندە»، «انانىڭ اناسى»، «ەر انا»، «ەكىنشى بياعا»، «اۆتوبيوگرافيالىق اڭگىمە»، «جاپون باللاداسى» سياقتى 32 اڭگىمەسى ەنگەن”، - دەيدى س.مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنىنىڭ عىلىمي ءبولىم جەتەكشىسى نازگۇل التايەۆا.
ۇلتتىق ءسوز ونەرى تاريxىنداعى زور تۇلعا عابيت مۇسىرەپوۆتىڭ شىعارماشىلىعىن، اڭگىمە جانرىنداعى شەبەرلىك قۇپياسىن كەڭىنەن ناسيحاتتاۋ ماقساتىندا وتكەن بۇل ءىس-شاراعا اقىن، قازاقستان جازۋشىلار وداعى باسقارما ءتوراعاسىنىڭ ورىنباسارى، قازاقستاننىڭ ەڭبەك سىڭىرگەن قايراتكەرى قاسىمحان بەگمان، م.اۋەزوۆ اتىنداعى ادەبيەت جانە ونەر ينستيتۋتىنىڭ اعا عىلىمي قىزمەتكەرى گۇلزيا ءپىرالى، اقىن، ق ر ءبىلىم بەرۋ ءىسىنىڭ ۇزدىك قىزمەتكەرى كامنۇر ءتالىم ۇلى، الماتى قالاسى مۋزەيلەر بىرلەستىگى ديرەكتورىنىڭ دامۋ جونىندەگى ورىنباسارى ارىن سارسەمبايەۆ جانە باسقا دا ادەبيەت جاناشىرلارى قاتىسىپ، وي-پىكىرلەرىمەن ءبولىستى.
قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى، ءداستۇرلى ءانشى نۇراسىل مادىبەك اقان سەرىنىڭ ءانى «جامال قىز» بەن حالىق ءانى «سۇرجەلگەنشەنى» ورىنداپ، تىڭداۋشىلاردى ءبىر سەرپىلتىپ تاستادى.
ءىس-شارانى مۋزەي كەشەنىنىڭ اعا عىلىمي قىزمەتكەرى ءا.قايىربەكوۆ قورىتىندىلادى.