ستۋدەنتتەر مەن جاس عالىمدار اراسىندا «كاكىش ۇلى وقۋلارى» ۇيىمداستىرىلدى
الماتىدا كورنەكتى ادەبيەتتانۋشى عالىم، سىنشى تۇرسىنبەك كاكىشيەۆتىڭ 95 جىلدىعى اتالىپ ءوتتى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
مادەني شارا اياسىندا قايراتكەر تۇرعان كوپقاباتتى ءۇيدىڭ قابىرعاسىنا ەسكەرتكىش تاقتا قويىلدى. قازاق ادەبيەتىنىڭ قايراتكەرى تۋرالى شاكىرتتەرى مەن ۇرپاقتارى ەستەلىكتەرىمەن ءبولىستى. پروفەسسور تۇرسىنبەك كاكىش ۇلى قازاق ادەبيەتتانۋ عىلىمىن تىڭ جاڭالىقتارمەن بايىتىپ، قازاق كوركەم سىنىنىڭ تاريحىن زەرتتەگەن. ساكەن سەيفۋلليننىڭ ءومىرى مەن شىعارماشىلىعىن زەرتتەپ، ساكەنتانۋ عىلىمىنىڭ نەگىزىن قالادى. عالىم جيىرماعا جۋىق كىتاپ جازعان. ونىڭ جەتەۋى ساكەن سەيفۋللينگە ارنالعان. بۇعان قوسا مەكتەپ وقۋشىلارىنا ارناپ وقۋلىقتار جازدى.
«ساكەندى تانىتۋداعى ۇلكەن ەسەلى ەڭبەگى، ماعجان مەن ساكەن ەكەۋىن جارىستىرىپ وتىرىپ، ماعجاننىڭ اتىن ايتۋعا بولمايتىن سول اناۋ عاسىردىڭ الپىسىنشى جىلدارى، جەتپىسىنشى جىلدارى تاياعىن جەپ ءجۇرىپ، ماعجاننىڭ اتىن تايعا تاڭباداي ەتىپ باسقان. ساكەن ەكەۋىنىڭ كەلىسكەن كەزىندە، كەڭەسكەن كەزىندە ەكەۋىنىڭ اراسىنداعى ۇلكەن تامىرلى بايلانىستى ءبىر عاجاپ زەرتتەۋشىلىك شەبەرلىكپەن جازىپ ەدى»، - دەيدى اقىن، دراماتۋرگ نۇرلان ورازالين.
سونداي-اق عالىم ۇزاق جىل ەڭبەك ەتكەن ءال-فارابي اتىنداعى قازاق ۇلتتىق ۋنيۆەرسيتەتىندە عىلىمي كونفەرەنسيا ءوتتى. ءىزباسارلارى تۇرسىنبەك كاكىشيەۆ شەتەلگە شىققان ساپارلارىندا قازاق حالقىنىڭ ادەبي-مادەني مۇرالارىن ىزدەستىرىپ، ەلگە اكەلۋشى ەدى دەپ ەسكە الدى. كونفەرەنسيا بارىسىندا ادەبيەتشىلەر مەن قوعام قايراتكەرلەرىنىڭ تۇرسىنبەك كاكىشيەۆ تۋرالى جازعان ەستەلىكتەرى مەن زەرتتەۋلەرى توپتاستىرىلعان جيناق تانىستىرىلدى. ستۋدەنتتەر مەن جاس عالىمدار اراسىندا «كاكىش ۇلى وقۋلارى» دا ۇيىمداستىرىلدى. وعان 3 نوميناسيا بويىنشا 60-تان استام جۇمىس قابىلدانعان. جەڭىمپازدار ارنايى ديپلوم جانە اقشالاي سىيلىقپەن ماراپاتتالادى.