الماتىنىڭ قالا قۇرىلىسىن باقىلاۋ باسقارماسى قاراعايلى شاعىن اۋدانىنداعى اكح «چاپايەۆا»، ۋچاسكە 426، 504 مەكەنجايىندا ورنالاسقان تۇرعىن ءۇي كەشەنىن بۇزۋ جۇمىستارىنىڭ باستالعانى تۋرالى ءمالىم ەتتى، دەپ حابارلايدى aqshamnews.kz.
بۇعان دەيىن جۇرگىزىلگەن جوسپاردان تىس تەكسەرۋ بارىسىندا تاپسىرىس بەرۋشى (جەكە تۇلعا) تۇرعىن ءۇي كەشەنىن سجت-سىز، جوبا ەسكيزىن كەلىسۋسىز، قۇرىلىس-مونتاج جۇمىستارىنىڭ باستالعانى تۋرالى حابارلاماسىز جانە ءتيىستى ساراپتاماسىز سالعانى انىقتالدى.
تاپسىرىس بەرۋشىگە قاتىستى اكىمشىلىك شارالار قولدانىلىپ، الماتى قالاسىنىڭ مامانداندىرىلعان اۋدانارالىق ەكونوميكالىق سوتىنا عيماراتتى ءسۇرۋ تۋرالى تالاپ ارىز بەرىلدى.
2023 جىلدىڭ 26 شىلدەسىندە الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن تالاپ قاناعاتتاندىرىلدى. 2023 جىلدىڭ 26 قازانىندا الماتى قالالىق سوتى ءبىرىنشى ساتىداعى شەشىمدى وزگەرىسسىز قالدىردى. 2024 جىلدىڭ 30 قاڭتارىندا اتقارۋ پاراعى الماتىنىڭ ادىلەت دەپارتامەنتىنە جولدانىپ، اتقارۋشىلىق ءىس قوزعالدى.
بۇگىن ءسۇرۋ جۇمىستارى سوت ورىنداۋشىلارىنىڭ قاتىسۋىمەن باستالدى.
ەستەرىڭىزگە سالا كەتەيىك، الماتى اكىمى ەربولات دوسايەۆتىڭ قۇرىلىسقا باقىلاۋدى كۇشەيتۋ جونىندەگى تاپسىرماسى اياسىندا وتكەن جىلدىڭ باسىنان بەرى 55 زاڭسىز نىسان، ونىڭ ىشىندە «مەچتا»، KHAN، «الما گاردەن» تۇرعىن ءۇي كەشەندەرى جانە باسقا دا نىساندار تولىق نەمەسە جارتىلاي سۇرىلگەن.