الماتىدا «Kazakh Piano Fest - 2023» اتتى العاشقى حالىقارالىق فورتەپيانو فەستيۆالى ءوتتى، دەپ حابارلايدى almaty-akshamy.kz «حابار 24» سىلتەمە جاساپ.
9 قازاندا باستالعان مادەني شارا قازاقستان فورتەپيانو مەكتەبىنىڭ نەگىزىن قالۋشى ەۆا كوگاننىڭ 95 جىلدىعىنا ارنالدى. فەستيۆالدە وتاندىق فورتەپيانو شەبەرلەرىنەن بولەك، اقش، رەسەي، گرۋزيا، رۋمىنيا جانە گەرمانيانىڭ مۋزىكا مۇعالىمدەرى شەبەرلىك ساباعىن وتكىزىپ، ونەر كورسەتتى. جاس مۋزىكانتتار دا تانىمال كومپوزيسيالاردى ناقىشىنا كەلتىرىپ ورىندادى.
- ەۆا كوگاننىڭ 95 جىلدىعىنا ارنالعان فەستيۆال ءوتىپ كەلە جاتقانىنا وتە قۋانشىتىمىز. سەبەبى قاي جىلدان بەرى وسى فورتەپيانولىق شىعارماشىلىق ونەردىڭ باسشىسى بولىپ، قازاقستاندا وسى جولدى اشىپ كەلگەن ەۆا كوگاننىڭ ونەرى قازىرگىدەي جارقىراپ تۇرسىن دەپ ءوزىمىزدىڭ وقۋشىلارىمىزدى وسى كىسىنىڭ اتىنداعى كونكۋرسقا شىعارىپ، جۇلدەلى قىلىپ، كەشەگى كونسەرتتە ويناپ جاتىر، - دەدى قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى دانا ءجۇبانوۆا-الي.