الماتىدا قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتىنىڭ باستاماسىمەن دوڭگەلەك ۇستەل ۇيىمداستىرىلىپ، وندا ەلىمىزدەگى قۇرىلىس سالاسىندا حالىقارالىق ستاندارتتاردى، ونىڭ ىشىندە FIDIC قۇرىلىس كەلىسىمشارتىنىڭ ستاندارتتى تۇرلەرىن قولدانۋ ماسەلەسى قارالدى، دەپ حابارلايدى Almaty-akshamy.kz.
اتالعان ءىس-شاراعا وتاندىق بيزنەس پەن مەملەكەتتىك ورگانداردىڭ وكىلدەرى قاتىسقانىن اتاپ وتكەن ءجون.
FIDIC پروفورمالارى – حالىقارالىق ينۆەستيسيالىق قۇرىلىس سالاسىندا نارىق قاتىسۋشىلارىنىڭ بايلانىسىن رەتتەپ، بارلىعىنىڭ مۇددەسىن تەڭ جاعدايدا ساقتاۋ ءۇشىن حالىقارالىق ينجەنەر-كونسۋلتانتتار قاۋىمداستىعى ازىرلەگەن بىرەگەي قۇرىلىس كەلىسىمشارتتارى سانالادى.
«قازقسعزي» اق-نىڭ باس ديرەكتورى بەگمان قۇلبايەۆتىڭ ايتۋىنشا، ەلىمىزدە وسى سالاداعى وزەكتى ماسەلەلەردى، ايتالىق اۆتورلىق جانە تەحنيكالىق قاداعالاۋدى، سونداي-اق جەكەلەگەن ينجەنەرلىك قىزمەتكەرلەردىڭ مارتەبەسىن ناقتىلاپ، بارلىق تاراپتىڭ مۇددەسىن تەڭ جاعدايدا ساقتاۋ ءۇشىن ءقازىر جاڭا قالا قۇرىلىسى كودەكسى ازىرلەنىپ جاتىر. بۇل - ەگەمەن ەلىمىزدىڭ تاريحىندا قۇرىلىس سالاسىنداعى تۇڭعىش كەشەندى زاڭنامالىق اكت.
وسى ورايدا BI Construction & Engineering كومپانياسىنىڭ وپەراسيالىق ماسەلەلەر جونىندەگى باسقارۋشى ديرەكتورى دارحان راحيموۆ جاڭا زاڭ مەردىگەر ۇيىمداردىڭ دا مۇددەسىن قورعايدى دەگەن سەنىمدە.
قۇرىلىستاعى ينجەنەر-كەڭەسشىلەر ۇلتتىق قاۋىمداستىعىنىڭ (قيكۇق) باس ديرەكتورى ولگا كۋبانسكايا ايتقانداي، FIDIC كەلىسىمشارتتارىن ورىندى قولدانۋ ءۇشىن سونداي ۇلگىدەگى كەلىسىمشارتتارمەن جۇمىس ىستەيتىن ماماندار قولدانىستاعى زاڭ مەن ادەتتەگى نورمالاردىڭ اراسىنداعى ايىرماشىلىقتى اجىراتا ءبىلۋى ءتيىس. «FIDIC كەلىسىمشارتتارىنا سايكەس جۇزەگە اسىرىلاتىن جوبالار باسقارۋدىڭ تىڭ ءتاسىلىن قاجەت ەتەدى»، دەدى و.كۋبانسكايا.
بۇل رەتتە ساراپشىلار تمد ەلدەرىندە اتالعان كەلىسىمشارتتاردىڭ قولدانۋ تاجىريبەسىن ودان ءارى دامىتۋ ءۇشىن شەتەلدەن FIDIC بويىنشا سەرتيفيكاتتالعان مامانداردى تارتۋدان بولەك، سونداي-اق جەرگىلىكتى ينجەنەرلەر مەن جوبالاۋ مەنەدجەرلەرىن دايىنداۋعا كوبىرەك كوڭىل ءبولۋ كەرەك دەپ سانايدى. ونىڭ ىشىندە ۋنيۆەرسيتەتتەر مەن كاسىپتىك ءبىلىم بەرۋ ورىندارىندا مامانداردى ساپالى دايارلاۋعا باسىمدىق بەرۋ قاجەت دەگەن ورتاق پىكىرگە كەلدى قاتىسۋشىلار.
ايتا كەتەيىك، ەلىمىزدە FIDIC ستاندارتتارى بويىنشا قاجەتتى كەڭەستى «قازاقستاندىق ۇلتتىق كاسىبي ينجەنەرلەر مەن كەڭەسشىلەر قاۋىمداستىعى» زتب (كيكقۇق زتب) بەرىپ كەلەدى.