الماتىدا قۇلاعى ناشار ەستيتىن جۇرگىزۋشىنى مازاقتاپ، ۆيدەوسىن جاريالاعان ايەلدىڭ تۇلعاسى انىقتالىپ، پوليسيا بولىمشەسىنە جەتكىزىلدى، دەپ حابارلايدى Aqshamnews.kz ءتىلشىسى.
المالى اۋداندىق پوليسيا ءبولىمى نۇريلا امانبايەۆانى پروفيلاكتيكالىق اڭگىمەگە شاقىرعانىن مالىمدەدى. قوعامدا رەزونانس تۋدىرعان روليك ءۇشىن سىنعا قالعان، 63 مىڭنان استام وقىرمانى بار بلوگەر ۆيدەونى ءوشىرىپ، كەشىرىم سۇرادى. پوليسيا ونىڭ كىناسىن مويىنداعانىن، ءتۇسىندىرۋ جۇمىستارى جۇرگىزىلگەنىن اتاپ ءوتىپ، الەۋمەتتىك جەلى قولدانۋشىلارىن جاريالايتىن كونتەنتكە جاۋاپكەرشىلىكپەن قاراۋعا شاقىردى.
بلوگەردىڭ ايتۋىنشا، ول تاكسي جۇرگىزۋشىسىنىڭ وتباسىمەن جەكە كەزدەسىپ، جاعدايدى ءتۇسىندىرىپ، كەشىرىم سۇراعان. جۇرگىزۋشىنىڭ تۋىستارى وزدەرىنىڭ جانە جاقىندارىنىڭ سۋرەتتەرىن جاريا ەتپەۋدى سۇراپ، تاراپتار كەلىسىمگە كەلگەن.
وقيعاعا بايلانىستى جەلىدە پىكىر ەكىگە جارىلدى: ءبىرى بلوگەردى قولداسا، ەندى ءبىرى ونىڭ ارەكەتىن قاتاڭ ايىپتاپ، جاۋاپكەرشىلىككە تارتۋدى تالاپ ەتتى.