الماتى اكىمى ەربولات دوسايەۆ المالىندا وتكەن ەسەپتىك كەزدەسۋدە اۋدان تۇرعىندارىنا ساپالى مەديسينالىق قىزمەت كورسەتۋ ماسەلەسىنىڭ وڭ شەشىمىن تاۋىپ كەلە جاتقانىن ايتتى، دەپ حابارلايدى aqshamnews.kz
2025 جىلدىڭ ناۋرىز ايىندا №3 ەمحانا عيماراتىنىڭ كۇردەلى جوندەۋى اياقتالادى. جوندەۋ جۇمىستارى اياسىندا كونسترۋكتيۆتى ەلەمەنتتەر قالپىنا كەلتىرىلىپ، ىشكى بولمەلەر جاڭعىرتىلادى.
قالالىق ادام رەپرودۋكسياسى ورتالىعىنىڭ كۇردەلى جوندەۋ جۇمىستارى جالعاسىپ جاتىر. بيىل ناۋرىز ايىندا جىبەك جولى، 124 مەكەنجايىنداعى عيماراتتا جوندەۋ جۇمىستارىن اياقتاۋ جوسپارلانىپ وتىر. تورەقۇلوۆ كوشەسى، 73 مەكەنجايىنداعى عيماراتتى جوندەۋ جۇمىستارى 2025 جىلدىڭ 2-توقسانىندا بىتەدى.
«انا مەن بالانىڭ دەنساۋلىعىن ساقتاۋ ءارقاشان اكىمدىك جۇمىسىنىڭ باسىمدىعى بولىپ قالا بەرەدى. 1937 جىلى سالىنعان №1 پەرزەنتحانا ەسكىرگەن جانە قازىرگى ستاندارتقا سايكەس كەلمەيدى. جاڭا عيماراتتىڭ ديزاينى اياقتالىپ، 2025 جىلدىڭ ماۋسىمىندا ساراپتاما باستالۋعا ءتيىس. 2025 جىلدىڭ جازىندا ەسكى عيماراتتى بۇزىپ، ونىڭ ورنىنا زاماناۋي قۇرىلعىلارمەن جابدىقتالعان جاڭا عيمارات سالىنادى. بۇل جۇمىس 2026 جىلدىڭ سوڭىندا اياقتالادى»، - دەدى الماتى اكىمى.
سونىمەن قاتار، ايتەكە بي مەن ماسانچي كوشەسىنىڭ قيىلىسىندا ورنالاسقان ەسكى قالالىق ريەۆماتولوگيا ورتالىعى عيماراتىنىڭ ورنىنا 500 ادام قابىلداۋعا ارنالعان جاڭا ەمحانا سالۋ كوزدەلگەن. جۇمىس وسى جىلدىڭ ماۋسىم ايىندا باستالىپ، 2026 جىلدىڭ مامىر ايىندا اياقتالماق.
ايتا كەتەيىك، الماتى اكىمىنىڭ تاپسىرماسىمەن 2024 جىلى دەنساۋلىق ساقتاۋ ينفراقۇرىلىمىن جاڭعىرتۋعا بولىنگەن قارجى 26،3 ملرد تەڭگەگە، ياعني 2،5 ەسە ارتتى، ال 2025 جىلى تاعى 2،6 ەسە ءوسىپ، 69،4 ملرد تەڭگەگە دەيىن جەتەدى.