الماتىدا «قازاق ەسكەرتكىشتانۋى بويىنشا عىلىمي-زەرتتەۋ ورتالىعىنىڭ» سالتاناتتى اشىلۋ ءراسىمى ءوتتى.
عىلىم ورداسى عيماراتىندا ش.ش. ءۋاليحانوۆ اتىنداعى تاريح جانە ەتنولوگيا ينستيتۋتى رەسمي وتكەن جىلى قىركۇيەكتە قۇرىلعان «قازاق ەسكەرتكىشتانۋى بويىنشا عىلىمي-زەرتتەۋ ورتالىعىنىڭ» سالتاناتتى اشىلۋ ءراسىمىن وتكىزدى.
ورتالىقتىڭ قۇرىلۋى قازىرگى قازاقستان ءۇشىن ەسكەرتكىشتانۋدىڭ وزەكتى عىلىمي-تاجىريبەلىك باعىتىنىڭ ماڭىزدى ءرولىن كورسەتەدى. سونداي-اق ۇلتتىق عىلىم اكادەمياسىنىڭ جۇيەسىندەگى ەسكەرتكىشتانۋ ءداستۇرى ىسپەتتى ارنايى ماقساتتى جاسالعان ىرگەلى ەڭبەكتەرىنىڭ جالعاسى بولىپ تابىلادى.
«ايتا كەتكەن ءجون، قازاقستاندا 150 مىڭنان اسا ەلىمىزدىڭ وتكەنىن تانۋعا، سان الۋان مادەنيەتىن بىلۋگە تاۋسىلماس دەرەك كوزى بولاتىن تاريحي-مادەني، كوركەمدىك ماڭىزعا يە ەسكەرتكىشتەر بار. ولار يدەولوگيالىق، ناسيحاتتىق، ەكونوميكالىق ماڭىزعا يە جانە قازىرگى قازاقستاندىق قوعام ومىرىندە وزىندىك ورنى بار. كەڭ بايتاق دالادا تارىداي شاشىلعان كونە قۇرىلىستار مەن كەشەندەردىڭ ماڭىزدىلىعى قازىرگى كۇنگى گەوساياسي تۇرعىدان قيىن-قىستاۋ كەزەڭدە تىپتەن ارتا تۇسپەك، ويتكەنى ولار تەرريتوريالىق تۇتاستىقتىڭ، مەملەكەت تاۋەلسىزدىگىنىڭ نەگىزى بولاتىن تاريحي-مادەني ىرگەتاسى بولىپ تابىلادى.
قازىرگى تاڭدا تەز بۇزىلىپ، جوعالىپ جاتقان بىرەگەي ەسكەرتكىشتەردى كەشەندى زەرتتەۋ، اتريبۋسيا، قورعاۋ، قايتا قالپىنا كەلتىرۋ، ساقتاۋ جانە ارى قاراي پايدالانۋ جالپى مەملەكەتتىك ماڭىزى بار مىندەت»، – دەپ حابارلادى شارا ۇيىمداستىرۋشىلارى.
سالتاناتتى اشىلۋ راسىمىنە عالىمدار، ارحەولوگ، ارحيتەكتورلار، ينستيتۋت عالىمدارى قاتىستى. سونداي-اق ءىس-شارا بارىسىندا فوتو جانە كىتاپ كورمەلەرى ۇيىمداستىرىلدى، شىعىس ەلدەرىنىڭ حالىقارالىق اكادەمياسىنىڭ كوررەسپوندەنت-مۇشەسى س.ە. ءاجىعالي لەكسيا وقىدى.