الماتىدا ەسىرتكىنىڭ ءىرى پارتياسى تاركىلەندى

ەر ادامنان ءىرى كولەمدە ەسىرتكى جانە پسيحوتروپتىق زاتتار تاركىلەندى.

جەدەل-ىزدەستىرۋ ءىس-شارالارى بارىسىندا الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى پاترۋلدىك پوليسيا قىزمەتكەرلەرىمەن بىرلەسىپ، كۇدىكتى ازاماتتى ۇستادى، دەپ حابارلايدى aqshamnews.kz.

Polisia.kzء-تىڭ مالىمەتىنشە، ەر ادامدى جەكە ءتىنتۋ بارىسىندا ىشىندە ۇنتاق زاتى بار بايلامدار تابىلدى، ال ونىڭ تۇرعىلىقتى جەرىن ءتىنتۋ كەزىندە ودان دا كوپ مولشەردەگى ەسىرتكى، وراۋىش ماتەريالدار، ەلەكتروندى تارازىلار، شىنى كولبالار جانە باسقا دا قۇرىلعىلار تابىلدى. سوت ساراپتامانىڭ قورىتىندىسىنا سايكەس تاركىلەنگەن زات سالماعى 50،2 كەلىنى قۇرايتىن گاشيش ەسىرتكى زاتى، سونداي-اق جالپى سالماعى 700 گرامم بولاتىن مەفەدروننىڭ انالوگى.

 – بۇل بيىلعى جىلى تاركىلەنگەن ەڭ ءىرى پارتيانىڭ ءبىرى. الماتى پوليسياسى ەسىرتكى تاراتۋ ارنالارىنىڭ جولىن كەسۋ بويىنشا جۇيەلى جۇمىسىن جالعاستىرۋدا. ءبىز تاراتۋ جەلىسىن قۇرۋ ارەكەتىن قاداعالاپ وتىرامىز. ءاربىر دەرەك بويىنشا كىدىرىسسىز شارالار قابىلدانىپ جاتىر، - دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى مۇرات جۇمابايەۆ.

قىلمىستىق ءىس ق ر قك-نىڭ 297-بابىنىڭ 3-بولىگىمەن تىركەلدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. سوتقا دەيىنگى تەرگەۋ جالعاسۋدا.