وعان قوسا ەسىرتكىنى جارنامالايتىن 450 سايتتى بۇعاتتالدى.
الماتىدا ەسىرتكىنى جارنامالاعان بەس مىڭ گراففيتي-جازبالار بويالدى، دەپ حابارلايدى Almaty-akshamy.kz ءىىم اقپاراتتىق پورتالىنا سىلتەمە جاساپ.
الماتى قالالىق پد باسشىسى حالىق الدىنداعى ەسەپ بەرۋ كەزدەسۋىندە 380 كەلى ەسىرتكى، ونىڭ ىشىندە 15 كەلى سينتەتيكالىق ەسىرتكى تاركىلەنىپ، زاڭسىز اينالىمعا جىبەرىلمەگەنىن ايتتى.
«ءبىز سينتەتيكالىق ەسىرتكىلەردى شىعاراتىن ءۇش ەسىرتكى زەرتحاناسىن جويدىق. ينتەرنەت-رەسۋرستار ارقىلى سينتەتيكالىق مەفەدرون ەسىرتكى زاتىن دايىنداۋ جانە ساتۋمەن اينالىسقان ەسىرتكى بيزنەسى سالاسىنداعى ەكى ۇيىمداسقان قىلمىستىق توپتىڭ ارەكەتىنىڭ جولى كەسىلدى. بيىلعى جىلدىڭ باسىنان بەرى تاعى ءبىر ەسىرتكى زەرتحاناسىن انىقتادىق، وندا 150 ميلليون تەڭگەنىڭ ەسىرتكى شيكىزاتى تاركىلەندى»، – دەدى قانات تايمەردەنوۆ.
ەرىكتىلەر مەن بەلسەندى ازاماتتاردىڭ ارقاسىندا ەسىرتكىنىڭ تارالۋى تۋرالى اقپاراتى بار بەس مىڭ گراففيتي-جازبالار بويالدى. ەسىرتكى ساتاتىن 450 ينتەرنەت-سايت بۇعاتتالدى. «سونىمەن قاتار، قالانىڭ وقۋ ورىندارىندا دا ەسىرتكىگە قارسى تاقىرىپتار بويىنشا 260 پروفيلاكتيكالىق ءىس-شارا جۇرگىزىلدى. وسى جىلى دا بۇل باعىتتاعى بارلىق ءىس-شارالار جالعاسىن تابادى جانە ەرەكشە باقىلاۋدا بولادى»، – دەدى قانات تايمەردەنوۆ.