زاڭسىز اينالىمنان 120 كەلىدەن استام ەسىرتكى زاتتارى تاركىلەندى.
جىل باسىنان بەرى 4 ەسىرتكى زەرتحاناسى جويىلدى، دەپ حابارلايدى Almaty-akshamy.kz
الماتى پوليسياسى جىل باسىنان بەرى 283 ەسىرتكى قىلمىسىن انىقتادى. ەسىرتكى قىلمىسىنا قارسى كۇرەس باسقارماسى جۇمىسىنداعى باسىم باعىت – سينتەتيكالىق ەسىرتكىلەردى انىقتاۋ جانە ولاردى ءوندىرۋ بويىنشا زەرتحانالاردىڭ قىزمەتىن توقتاتۋ.
72 توننا پرەكۋرسورلار، ەسىرتكى وندىرۋگە پايدالانىلعان باسقا دا زاتتار مەن قۇرال-جابدىقتار تاركىلەنىپ، 8 توننا پايدالانۋعا دايىن زاتتاردىڭ اينالىمى توقتاتىلدى. سينتەتيكالىق ەسىرتكىلەردى بەتبەلگىلەر ارقىلى تاراتۋ ءۇردىسى وزەكتى ماسەلەلەردىڭ ءبىرى بولىپ وتىر. جىل باسىنان بەرى 30 ەسىرتكى بەتبەلگىسىن قويۋشىلار انىقتالدى.
"ءبىز حالىقپەن بىرىگىپ، بەتبەلگى قويۋشىلاردىڭ سانىن بارىنشا ازايتا الامىز. قالالىق پد-نىڭ سەنىم تەلەفونى (Whatsapp 87055497025) تاۋلىك بويى جۇمىس ىستەيدى، وعان ەسىرتكى قىلمىسى دەرەكتەرى، ءجيى قولدانىلاتىن بەتبەلگىلەردىڭ ورىندارى، بەتبەلگى قويۋشىلار مەن تۇتىنۋشىلار كەلەتىن كولىكتەردىڭ نومىرلەرى، گراففيتي سۋرەتتەرىنىڭ ورنالاسقان جەرى، ەسىرتكى قويمالارىنىڭ مەكەنجايلارى تۋرالى حابارلاۋعا بولادى"، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ.
بۇگىنگى كۇنى 3000-عا جۋىق گراففيتي-سۋرەتتەرى انىقتالىپ، ۇستىنەن بوياۋ ارقىلى جويىلدى. ەسىرتكىنى تاراتۋمەن جانە جارنامالاۋمەن اينالىساتىن 238 ينتەرنەت-سايت انىقتالدى جانە بۇعاتتالدى.
پوليسيادا ەسىرتكى قىلمىسىنىڭ الدىن الۋ جانە ونىمەن كۇرەسۋ ماقساتىندا "حاقنازار" قوعامدىق قورىمەن بىرلەسىپ، الماتى قالاسى اكىمدىگىنىڭ جاستار ساياساتى ماسەلەلەرى باسقارماسىنىڭ قولداۋىمەن "ناركوستوپ" جوباسى قولعا الىنعانىن ايتىپ ءوتتى.