الماتى قالاسىندا "قۇقىقتىق ءتارتىپ" جەدەل-پروفيلاكتيكالىق ءىس-شاراسى اياسىندا پوليسيا قىزمەتكەرلەرى ەسىرتكى قۇرالدارىنىڭ زاڭسىز اينالىمىنا قاتىسى بار دەگەن كۇدىكپەن بىرنەشە تۇلعانى ۇستادى، - دەپ حابارلايدى Aqshamnews.kz.
جەكە ءتىنتۋ بارىسىندا ۇستالعانداردىڭ بىرىنەن - شەتەل ازاماتىنان ۇنتاق ءتارىزدى زات سالىنعان بىرنەشە ورام تابىلىپ، تاركىلەندى. ساراپتاما قورىتىندىسىنا سايكەس، الىنعان زاتتار تىيىم سالىنعان ەسىرتكى قۇرالدارى ساناتىنا جاتادى. سونىمەن قاتار كۇدىكتىنىڭ "جاسىرىن قويما" ءتاسىلى ارقىلى جۇزەگە اسىرىلاتىن ىقتيمال كۋرەرلىك قىزمەتكە قاتىستىلىعى تەكسەرىلۋدە. مەديسينالىق كۋالاندىرۋ ناتيجەسىندە كۇدىكتىنىڭ پسيحواكتيۆتى زاتتاردى تۇتىنعانى انىقتالدى. اتالعان دەرەك بويىنشا ماتەريالدار سوتقا دەيىنگى تەرگەپ-تەكسەرۋ تارتىبىمەن تىركەلىپ، ءىستىڭ بارلىق ءمان-جايى انىقتالۋدا.
- ءبىز ەسىرتكى تاراتۋدىڭ جولدارىن جۇيەلى تۇردە انىقتاپ، كۋرەرلىك جەلىلەرگە تارتىلعان تۇلعالاردى اشكەرەلەۋ جۇمىستارىن تۇراقتى تۇردە جۇرگىزىپ كەلەمىز. مۇنداي جەدەل ءىس-شارالار ۇزدىكسىز وتكىزىلەدى جانە ءاربىر انىقتالعان دەرەككە قۇقىقتىق باعا بەرىلەدى. الماتى پوليسياسى قوعامدىق قاۋىپسىزدىكتى قامتاماسىز ەتۋ جانە ەسىرتكى قىلمىسىنىڭ الدىن الۋ باعىتىنداعى جۇمىستارىن جالعاستىرا بەرەدى، - دەدى الماتى قالاسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى مۇرات جۇمابايەۆ.
قازىرگى ۋاقىتتا تەكسەرۋ جانە جەدەل-ىزدەستىرۋ ءىس-شارالارى جالعاسۋدا.