ەسىرتكى قىلمىسىنا قارسى كۇرەس باسقارماسىنىڭ پوليسەيلەرى اۋەزوۆ اۋداندىق پب-نىڭ قىزمەتكەرلەرىمەن بىرلەسىپ، «تاجىريبەلى» ەسىرتكى تاراتۋشىنى قولعا ءتۇسىردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«تۇركىستان وبلىسىنىڭ 26 جاستاعى تۇرعىنى كۋرەر – “ەسىرتكى قويىپ كەتۋشى” بولىپ جۇمىس ىستەگەن. جاس جىگىتتىڭ مەسسەندجەر ارقىلى “جۇمىس بەرۋشىگە” جاساعان جۇمىسى تۋرالى ەسەپ جىبەرىپ وتىرعاندىعى انىقتالدى: سۋرەت پەن گەولوكاسيانى كورسەتەتىن مەكەنجايدى جىبەرگەن. وسى ادىسپەن “تاپسىرمالاردى” العان. ول “جۇمىسى ءۇشىن” تولەمدى كريپتوۆاليۋتامەن قابىلداعان. كۇدىكتى "التىن بەسىك" شاعىناۋدانىنداعى ۇيلەردىڭ ءبىرىنىڭ ماڭىندا ۇستالدى. جەكە ءتىنتۋ كەزىندە ودان كوك جانە سارى ءتۇستى يزولەنتاعا ورالعان ەرەكشە ءيىستى، اقشىل ءتۇستى زاتى بار 26 بۋما تابىلدى جانە تاركىلەندى. ساراپتاما قورىتىندىسى بويىنشا بۇل زات مەفەدرون ەسىرتكىسى بولىپ شىقتى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
سوتقا دەيىنگى تەرگەۋ ق ر قك-نىڭ 297 بابى 3 بولىگى (ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ) بويىنشا جۇرگىزىلىپ جاتىر