الماتى قالاسىندا جۇرگىزىلگەن جەدەل ءىس-شارا بارىسىندا ەسىرتكى ساۋداسىنا قاتىسى بار 22 جاستاعى جىگىت ۇستالدى.
ول جەتىسۋ اۋدانىنداعى جەكە سەكتور اۋماعىندا قولعا ءتۇستى. پوليسيا قىزمەتكەرلەرىنىڭ مالىمەتىنشە، كۇدىكتى سينتەتيكالىق ەسىرتكىنى جاسىرىن ورىندارعا قالدىرىپ، ونىڭ مەكەنجايى مەن فوتوسۋرەتىن «جۇمىس بەرۋشىلەرىنە» جىبەرىپ وتىرعان، دەپ حابارلايدى aqshamnews.kz Polisia.kz-كە سىلتەمە جاساپ.
وسىنداي كەزەكتى ارەكەتتەرىنىڭ بىرىندە ول جەدەل ۋاكىلدەردىڭ قىراعى نازارىنا ءىلىنىپ، قۇرىقتالدى. پوليسيا دەپارتامەنتىنىڭ مالىمەتىنشە، ءتىنتۋ كەزىندە كۇدىكتىدەن قىزعىلت ءتۇستى ۇنتاق سالىنعان توعىز وراما تاركىلەندى.
جاس جىگىت ەسىرتكى زاتتارىن ءۇشىنشى تۇلعالارعا وتكىزۋ ماقساتىندا جاسىرىپ كەتكەنىن مويىندادى. ءقازىر الماتىعا "سينتەتيكانى" جەتكىزۋ ارنالارى مەن قىلمىستىق توپتىڭ وزگە دە مۇشەلەرىن انىقتاۋ باعىتىندا كەشەندى جەدەل ءىس-شارالار جۇرگىزىلۋدە. بۇل دەرەك بويىنشا قىلمىستىق ءىس قوزعالعان.
قىلمىستىق پروسەستىڭ تالاپتارىنا سايكەس تەرگەۋ مۇددەسىنە وراي وزگە مالىمەتتەر جاريالانبايدى. سونىمەن قاتار قازاقستان رەسپۋبليكاسى كونستيتۋسياسىنىڭ 77-بابىنىڭ 3ء-بولىمى 1-تارماعىنا جانە ق ر قىلمىستىق كودەكسىنىڭ 19-بابىنىڭ 1-تارماعىنا سايكەس، سوتتىڭ زاڭدى كۇشى بار ۇكىمى شىققانعا دەيىن كەز كەلگەن ازامات كىناسىز دەپ تانىلادى.