الماتىدا ەسىرتكى ساتۋشىلار قۇرىقتالدى

ەسىرتكى ساتۋشىلاردىڭ جولى كەسىلدى

الماتىدا سينتەتيكالىق ەسىرتكى ساتۋمەن اينالىسقان ەكى جاس ۇستالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.

قالالىق پد تەرگەۋ باسقارماسىنىڭ وندىرىسىندە ادامدار توبىمەن اسا ءىرى كولەمدە سينتەتيكالىق ەسىرتكىنى ساتۋ بويىنشا قىلمىستىق ءىس بار. سينتەتيكالىق ەسىرتكى ساتۋمەن اينالىسقان جاستار ەسىرتكى قىلمىسىنا قارسى كۇرەس باسقارماسى قىزمەتكەرلەرىنىڭ كوزىنە ءتۇستى. كەيىننەن، اۋەزوۆ اۋدانىنىڭ اۋماعىندا ارنايى ءىس-شارالار كەزىندە 23 جاستاعى م.ەسىمدى جىگىت پەن 20 جاستاعى ن.ەسىمدى جاس قىزدىڭ قىلمىستىق ارەكەتتەرى قۇجاتتالدى.

– ساراپتاما جۇرگىزگەن وسى ءىس-شارالار بارىسىندا تاركىلەنگەن زات اسا كوپ مولشەردەگى سينتەتيكالىق ەسىرتكى – “مەفەدرون” ەكەندىگى انىقتالدى. ەكى ادام دا “سينتەتيكانى” تاراتۋشى عانا ەمەس، سونداي-اق ونى تۇراقتى تۇتىنۋشىلارى ەكەندىگى انىقتالدى. بىرنەشە كۇن بۇرىن ەسىرتكى ساۋداسىمەن اينالىسقان جۇپ ق ر قىلمىستىق ءىس جۇرگىزۋ كودەكسىنىڭ 128، 131-باپتارىنا سايكەس ۇستالىپ، الماتى قالاسى پد ۋاقىتشا ۇستاۋ يزولياتورىنا ورنالاستىرىلدى جانە تەرگەۋ سوتىنىڭ كەلىسىمىمەن قاماۋعا الىندى. ۇستالعانداردىڭ ارەكەتتەرى ق ر قك-نىڭ 297-بابى 3-بولىگى 1،3-تارماقتارىنا سايكەس كۆاليفيكاسيالانعان. قازىرگى ۋاقىتتا سوتقا دەيىنگى تەرگەۋ جالعاسۋدا، ءىس بويىنشا ءبىرقاتار سوت-مەديسينالىق ساراپتامالار تاعايىندالدى، – دەدى الماتى قالالىق پوليسيا دەپارتامەنتى تەرگەۋ باسقارماسى باستىعىنىڭ ورىنباسارى ءادىل سالايەۆ.