الماتىدا ەسىرتكى ساتۋشى مەن پورنوستۋديا يەسى ۇستالدى، – دەپ حابارلايدى Almaty-akshamy.kz Inform.kz-كە سىلتەمە جاساپ.
جەدەل ارەكەت ەسىرتكى قىلمىسىنا قارسى كۇرەس بولىمشەسىنىڭ قىزمەتكەرلەرىن الماتىداعى تۇنگى كلۋبتاردىڭ بىرىنە اپاردى. وندا 20 جاستاعى ۆ. ەسىمدى ازامات كوزگە ءتۇستى.
«ول جۇمىس ورنىندا ۇستالدى. جەكە ءتىنتۋ بارىسىندا كۇدىكتىدەن كليەنتكە ساتپاق بولعان سينتەتيكالىق ەسىرتكى سالىنعان بۋما تاركىلەندى. مامىلە بولعان جوق. ساراپتاما قورىتىندىسىنا سايكەس، ەسىرتكى پسيحوتروپتىق زات مەتكاتينون – 4 مەتيلمەتكاتينون (مەفەدرون) انالوگى. سونىمەن قاتار وسى كلۋبتىڭ تۇراقتى كەلۋشىلەرىنىڭ ءبىرى – 26 جاستاعى م. ەسىمدى ازاماتقا قاتىستى دا جەدەل جانە ارنايى ءىس-شارالار وتكىزىلدى. ونىڭ تۇرعىلىقتى جەرى بويىنشا رۇقسات ەتىلگەن ءتىنتۋ جۇرگىزىلدى. تۇرعىن ۇيدەگى كادىمگى پاتەر، بەلگىلى بولعانداي، ەسىرتكى تۇتىناتىن ادامداردىڭ ورنىنا اينالدى. سول جەردە 6 ادام ۇستالدى. ءقازىر ولاردىڭ جەكە باسى تەكسەرىلىپ جاتىر»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
جەدەل ۋاكىلدەردىڭ ايتۋىنشا، ەسىرتكى تۇتىناتىن ورىننىڭ يەسى پورنوستۋديانى دا قۇرعان. ول الماتى قالاسىنىڭ ەليتالىق شاعىن اۋدانىندا ورنالاسقان.
«وندا 18 جانە 22 جاستاعى ەكى قىز جۇمىس ىستەگەن. جەدەل دەرەكتەرگە سايكەس، ولار – ناشاقورلار. م. ەسىمدى ازامات ولاردى ەسىرتكىمەن قامتاماسىز ەتەدى. پورنوگرافيالىق مازمۇنداعى بەينەروليكتەر تاراتىلاتىن WEBKAM ستۋديانى ەر ادام بىرنەشە اي بۇرىن قۇرعان. قازىرگى ۋاقىتتا ونىڭ ارەكەتىن ق ر قك-نىڭ 311-بابى بويىنشا سارالاۋ ماسەلەسى شەشىلۋدە. نەگىزگى قىلمىستىق ءىس ق ر قك-نىڭ 297-بابى 1-بولىگى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى»، – دەدى الماعامبەتوۆ.