الماتى پوليسياسى زاڭسىز اينالىمنان ەسىرتكى مەن قارۋدىڭ ءىرى پارتياسىن تاركىلەۋ تۋرالى وسى جىلدىڭ قاڭتار ايىندا حابارلاعان بولاتىن.
سول كەزدە 52 جاستاعى ر. ەسىمدى ازاماتتىڭ پاتەرىنەن ەسىرتكى قىلمىسىنا قارسى كۇرەس باسقارماسىنىڭ جەدەل قىزمەتكەرلەرى ەسىرتكى زاتتارىنان بولەك، جاسىرىن ءتۇسىرىلىم مەن تەلەفوندى تىڭداۋعا ارنالعان ارنايى قۇرال-جابدىقتاردى دا تاپتى.پاتەردەن وسا تراۆماتيكالىق تاپانشاسى، پنيەۆماتيكالىق اۆتومات جانە سۋىق قارۋدىڭ بەلگىلەرى بار 6 ءتۇرلى پىشاق تابىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«كۇدىكتىنىڭ پاتەرىن ءتىنتۋ كەزىندە ەكى كەلىگە جۋىق ەرەكشە ءيىسى بار قوڭىر ءتۇستى زات، سونداي-اق ءدال وسىنداي تۇقىم تۇرىندەگى زات سالىنعان پوليەتيلەن بايلامى تابىلدى جانە تاركىلەندى. بولجام بويىنشا، ماسەلە گاشيش پەن قاراسورا تۇقىمى تۋرالى بولىپ وتىر. ەسىرتكى قىلمىسى جانە قارۋ ساقتاۋ دەرەگى بويىنشا سوتقا دەيىنگى تەرگەۋ امالدارى تىركەلدى. تەرگەۋ بارىسىندا كۇدىكتىنىڭ بۇرىن سوتتالعاندىعى دا ەسكەرىلەتىن بولادى»، – دەپ الماتى پوليسياسى سول كەزدە مالىمدەدى.
بوستاندىق اۋدانىنىڭ №2 اۋداندىق سوتى ر.ەسىمدى ازاماتتى ق ر قك-نىڭ 287-بابى 2-بولىگى، ق ر قك-نىڭ 296-بابى 4-بولىگىمەن كوزدەلگەن قىلمىستىق قۇقىق بۇزۋشىلىقتاردى جاساعانى ءۇشىن كىنالى دەپ تانىدى. ەندى ول قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە 3 جىل جازاسىن وتەيدى.