الماتىدا ەسىرتكى بيزنەسىمەن كۇرەس جونىندە كەشەندى جوسپاردىڭ جوباسى تانىستىرىلدى

الماتىدا ەسىرتكى قۇرالدارىنىڭ، پسيحوتروپتىق زاتتاردىڭ جانە ولاردىڭ پرەكۋرسورلارىنىڭ زاڭسىز اينالىمىنا قارسى كۇرەس جونىندەگى ورتالىق ازيا وڭىرلىك اقپاراتتىق ۇيلەستىرۋ ورتالىعىندا 2023-2025 جىلدارعا ارنالعان ەسىرتكى جانە ەسىرتكىمەن كۇرەس جونىندەگى كەشەندى جوسپار جوباسى تانىستىرىلدى.

ءىس-شاراعا مەملەكەتتەردىڭ قۇزىرەتتى ورگاندارىنىڭ باسشىلارى مەن ساراپشىلارى جانە واواۇك باقىلاۋشىلارى، حالىقارالىق ۇيىمداردىڭ وكىلدەرى قاتىستى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ەسىرتكىلەردىڭ، اسىرەسە، ولاردىڭ سينتەتيكالىق تۇرلەرىنىڭ تارالۋ پروبلەماسى بۇكىل الەمدىك قوعامداستىق ءۇشىن جاھاندىق ءقاۋىپ توندىرەدى. ەسىرتكىنىڭ زاڭسىز اينالىمىمەن كۇرەس – اسا وزەكتى جانە ستراتەگيالىق مىندەت»،- دەدى ق ر ءىىم ەسىرتكى قىلمىسىنا قارسى كۇرەس دەپارتامەنتىنىڭ باسشىسى، پوليسيا پولكوۆنيگى قاجىعالي يماجانوۆ.

سونىمەن قاتار، ول تانىستىرىلىم بارىسىندا نەگىزگى باعىتتاردى اتاپ ءوتتى.

«بىرىنشىدەن، ناشاقورلىقتىڭ الدىن الۋ، ەمدەۋ، ناشاقورلاردى ەسەپكە الۋ، وڭالتۋ جانە قايتا الەۋمەتتەندىرۋ جۇيەسىن دامىتۋ. تاعى ءبىر مىندەت – ەلەكتروندى تولەم جۇيەلەرى، دروپ كارتالارى، كريپتوۆاليۋتالار جانە باسقا دا قارجى قۇرالدارى ارقىلى زاڭسىز ەسىرتكى اينالىمىن توقتاتۋ. سونداي-اق، قازاقستانداعى ەڭ تانىمال ينتەرنەت-پلاتفورمالاردىڭ وكىلدىكتەرىنىڭ كەڭەيۋى ينتەرنەت-رەسۋرستاردى ەسىرتكىنىڭ زاڭسىز اينالىمىنا پايدالانۋدى شەكتەيدى. جوسپاردىڭ ءبىر باعىتى – سوت-ساراپتاما قىزمەتىن، سينتەتيكالىق ەسىرتكى جانە ولاردىڭ پرەكۋرسورلارىن زەرتتەۋ ادىستەرىن جەتىلدىرۋ»،- دەدى ول.

سپيكەردىڭ سوزىنشە، ۇسىنىلعان جوسپاردا زياندى زات «سينتەتيكا» جانە كۇشتى اسەر ەتەتىن باسقا دا زاتتاردىڭ زاڭسىز اينالىمى ءۇشىن جاۋاپكەرشىلىكتى كۇشەيتۋ قاراستىرىلعان.

مەملەكەتتىك ەسىرتكى ساياساتىن قالىپتاستىرۋ مەن جۇزەگە اسىرۋدا ءىىم-نىڭ ۇيلەستىرۋشى ءرولىن كۇشەيتۋ - وسى جوسپاردىڭ ءبىر تارماعى.

«ەسىرتكى بيزنەسى سالاسىنداعى حالىقارالىق ىنتىماقتاستىقتىڭ كەڭەيۋى بارلىق دەرلىك شەتەلدىكتەرمەن جانە حالىقارالىق ۇيىمدارمەن كوپ ۆەكتورلى ءوزارا ارەكەتتەسۋگە اسەر ەتەدى»،- دەدى ول.

ەسكە سالايىق، مەملەكەت باسشىسى قازاقستان حالقىنا جىل سايىنعى جولداۋىندا ەسىرتكى ماسەلەسىن شەشۋگە جالپىۇلتتىق سيپات بەرە وتىرىپ، كەشەندى جوسپار ازىرلەۋدى تاپسىرعان بولاتىن.