جاس پوليسيا قىزمەتكەرلەرىنىڭ جيىنىندا “ەرلىك ساباعى” ءوتتى
الماتى قالالىق پوليسيا دەپارتامەنتىندە ەرجۇرەك پوليسەيلەرگە قۇرمەت كورسەتىلدى، دەپ حابارلايدى Almaty-akshamy.kz.
جاس پوليسيا قىزمەتكەرلەرىنىڭ جيىنىندا “ەرلىك ساباعى” ءوتتى.
– بۇل جاقسى داستۇرگە اينالعان جىل سايىنعى شارا. ول ۇنەمى ءىىو ارداگەرلەرىنىڭ قاتىسۋىمەن وتەدى. بۇل جولى ءبىز ادامداردى قۇتقارۋدا، توتەنشە جاعدايلار مەن اۋىر قىلمىستاردىڭ جولىن كەسۋدە ەرەكشە كوزگە تۇسكەن پوليسيا قىزمەتكەرلەرىن ماراپاتتاۋدى قوستىق. ماقسات – جاس ۇرپاقتى پاتريوتتىق جانە وتانعا دەگەن سۇيىسپەنشىلىك رۋحىندا تاربيەلەۋ، سونداي-اق ىشكى ىستەر ورگاندارىنىڭ ءيميدجىن ارتتىرۋ، – دەدى الماتى قالالىق پوليسيا دەپارتامەنتى باستىعىنىڭ ورىنباسارى ولجاس مىرزابەكوۆ.
شاراعا قاتىسۋشىلاردىڭ قاتارىندا – تۇركسىب اۋدانىنىڭ پوليسيا قىزمەتكەرلەرى نۇرجان شاتۋنوۆ پەن عازيز حاماسقالييەۆ تە بولدى. ەسكە سالايىق، بۇل ءتارتىپ ساقشىلارى اناسى سىرتتاعى دارەتحاناعا لاقتىرىپ كەتكەن جاڭا تۋعان نارەستەنى امان الىپ قالعان بولاتىن.
– جاس ۇرپاق ەرجۇرەك ارىپتەستەرىمىزدەن ۇلگى الۋى كەرەك. بۇل پوليسيا قىزمەتكەرلەرى ءومىرى مەن دەنساۋلىعىنا قاراماستان، ەلىمىزدىڭ قاۋىپسىزدىگى مەن تۇراقتىلىعى جولىندا وتانعا ايانباي قىزمەت ەتۋدە. ولار زاماناۋي پوليسيا قىزمەتكەرىنە ءتان قاسيەتتەردى لايىقتى الىپ ءجۇر: كاسىبيلىك، جاۋاپتىلىق، ادىلدىك جانە ت.ب.، – دەپ تۇيىندەدى ولجاس مىرزابەكوۆ.
سونداي-اق سپيكەر ەلىمىزدىڭ ەڭ ءىرى شاھارىندا تاۋلىك بويى قاۋىپسىزدىكتى 6 مىڭعا جۋىق پوليسيا قىزمەتكەرى قامتاماسىز ەتەتىنىن اتاپ ءوتتى.