قالادان شىعاتىن نەگىزگى جولدارعا بەينەباقىلاۋ كامەرالارى ورناتىلادى.
بۇدان بىلاي الماتىدا جول ەرەجەسىن بۇزعان تاكسي جۇرگىزۋشىلەرى «سەرگەك» كامەرالارى ارقىلى انىقتالماق، دەپ حابارلايدى Almaty-akshamy.kz
الماتى قالالىق پد اكىمشىلىك پوليسيا باسقارماسى جول قوزعالىسى قاۋىپسىزدىگىن قامتاماسىز ەتۋ سالاسىنداعى باقىلاۋ ورگانى رەتىندە قالادان شىعۋ جولدارىنداعى كولىك قوزعالىسى جاعدايىنىڭ شيەلەنىسۋىنە الاڭداۋشىلىق بىلدىرەدى.
«كەيبىر ازاماتتار تاكسي قىزمەتىن كورسەتەتىن، ءوتىپ بارا جاتقان كولىكتەردى توقتاتۋ ماقساتىندا جول بويىندا قول سوزىپ، ءوز ارەكەتتەرىمەن كولىك كەپتەلىسى مەن توتەنشە جاعدايلاردىڭ تۋىنداۋىنا اكەپ سوقتىرادى. سول ارقىلى وزدەرىنىڭ عانا ەمەس، باسقا دا جول قوزعالىسىنا قاتىسۋشىلاردىڭ ءومىرى مەن دەنساۋلىعىنا ءقاۋىپ توندىرەدى. جوعارىدا ايتىلعانداردى نەگىزگە الا وتىرىپ، ءبىز «سەرگەك» كامەرالارىن قالادان شىعاتىن نەگىزگى جولدارعا ەكسپەريمەنتالدى تۇردە ورناتۋدى ۇسىندىق: تولە بي داڭعىلى – مومىش ۇلى كوشەسى، رايىمبەك داڭعىلى – مومىش ۇلى كوشەسى، رايىمبەك داڭعىلى – ءاشىموۆ كوشەسى»، – دەدى الماتى قالالىق پوليسيا دەپارتامەنتى اكىمشىلىك پوليسيا باسقارماسىنىڭ باستىعى نۇرلان امانبەك.
سونىمەن قاتار الماتى قالاسىنىڭ پوليسەيلەرى جول قوزعالىسىنا قاتىسۋشىلاردىڭ بارلىعىنا (جۇرگىزۋشىلەرگە دە، جاياۋ جۇرگىنشىلەرگە دە) قازاقستان رەسپۋبليكاسىنىڭ جول قوزعالىسى ەرەجەلەرىنىڭ تالاپتارىن ساقتاۋ قاجەتتىگىن ەسكەرتتى.