الماتىدا 2024 جىلدىڭ 20 قىركۇيەگىندە ەڭبەك كۇنىنە ارنالعان جالپى قالالىق بوس ورىندار جارمەڭكەسى وتەدى.
بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە مانساپ ورتالىعىنىڭ باسشىسى ادىلەت جاڭابايەۆ مالىمدەدى، دەپ حابارلايدى aqshamnews.kz.
جارمەڭكەدە قالانىڭ 60 كاسىپورنى ۇسىنىلادى، ولار 300-دەن استام جۇمىس ورنىنا 1000-نان استام بوس جۇمىس ورىندارىن ۇسىنادى.
«جارمەڭكەنىڭ نەگىزگى ماقساتى وقۋ ورىندارىنىڭ تۇلەكتەرىن جانە بارلىق جۇمىس ىزدەۋشىلەردى جۇمىسقا ورنالاستىرۋعا جاردەمدەسۋ بولىپ تابىلادى. ءىس-شاراعا قىزمەت كورسەتۋ، قارجى، ءوندىرىس، ساۋدا، قوعامدىق تاماقتانۋ جانە باسقا دا سالالاردىڭ وكىلدەرى قاتىسادى. جۇمىس ىزدەۋشىلەر جۇمىس بەرۋشىلەرمەن جەكە سويلەسە الادى، ءوز تۇيىندەمەلەرىن ۇسىنا الادى، جۇمىس شارتتارىن تالقىلاي الادى جانە الدىن الا اڭگىمەلەسۋدەن وتە الادى»، - دەپ ءبولىستى ءا.جاڭابايەۆ.
جارمەڭكەنىڭ وتەتىن ورنى: جىبەك جولى داڭعىلى، پانفيلوۆ كوشەسى قيىلىسى (اربات) ساعات 14:00-دە.
جارمەڭكەدە جاستار مەن جۇمىسسىز ازاماتتارعا ەرەكشە كوڭىل بولىنەدى.
سونىمەن قاتار، سپيكەر حالىقتى جۇمىسپەن قامتۋدى قولداۋعا باعىتتالعان ءبىرقاتار مەملەكەتتىك باعدارلامالار تۋرالى دا اتاپ ءوتتى. قاتىسۋشىلار سۇرانىسقا يە ماماندىقتار بويىنشا تەگىن كاسىپتىك وقۋدان وتە الادى، سونداي-اق «جاستار پراكتيكاسى» جانە «العاشقى جۇمىس ورنى» باعدارلامالارىن پايدالانا الادى.
تولىعىراق اقپاراتتى دوستىق داڭعىلى، 85 مەكەنجايىندا ورنالاسقان الماتى قالاسىنىڭ مانساپ ورتالىعىنان نەمەسە + 7 727 310-47-82 تەلەفون ءنومىرى بويىنشا الۋعا بولادى.