15 قىركۇيەكتەن 15 قاراشاعا دەيىن مەملەكەتتىك جانە جەكە مەنشىك مەديسينالىق ۇيىمدارعا تىركەلۋگە بولادى.
بۇل تۋرالى تۋرالى «رەسپۋبليكالىق ەلەكتروندىق دەنساۋلىق ساقتاۋ ورتالىعى» الماتى قالالىق فيليالىنىڭ ديرەكتورى گۇلنار ىسقاقوۆا ايتىپ بەردى، دەپ حابارلايدى Almaty-akshamy.kz.
قازاقستاندا العاشقى مەديسينالىق-سانيتارلىق كومەك (بمسك) ۇيىمىن ەركىن تاڭداۋ بويىنشا بەكىتۋ ناۋقانى باستالادى. ءداستۇرلى تۇردە بۇل ءىس-شارا 2 اي بويى وتكىزىلەدى.
«بۇگىندە الماتىلىقتاردىڭ مەديسينالىق ساقتاندىرۋ اياسىندا قىزمەت كورسەتۋ ءۇشىن 71 مەديسينالىق مەكەمەگە تىركەلۋ مۇمكىندىگى بار، ونىڭ ىشىندە 40 مەملەكەتتىك جانە 31 جەكە مەنشىك نىسانى بار»، – دەدى گ. ىسقاقوۆا.
سپيكەردىڭ ايتۋىنشا، تىركەۋ ناۋقانى كەزىندە ازاماتتار ءوزى تۇراتىن اۋماق شەڭبەرىندەگى مەملەكەتتىك قانا ەمەس، جەكە مەنشىك كلينيكالارعا دا تىركەلە الادى. ول ءۇشىن ەمحانا مەديسينالىق ساقتاندىرۋ قورىنىڭ جەتكىزۋشىلەر تىزىمىندە بولۋى ءتيىس.
اتاپ وتسەك، بيىلعى ناۋقان بارىسىندا ەمحانا اۋىستىرعان ازاماتتار ءوزى تاڭداعان ەمدەۋ مەكەمەسىنىڭ قىزمەتىن 2023 جىلدان باستاپ پايدالانا الادى. جالپى، ەمحانا اۋىستىرۋ مىندەتتى ەمەس. بۇرىنعى ەمحانا قىزمەتىنە كوڭىلى تولاتىن ازاماتتار ءارى قاراي دا بۇرىنعى كلينيكانىڭ قىزمەتىن پايدالانا بەرسە بولادى.
«ەمحانا ءوزى قىزمەت كورسەتەتىن ايماقتان تىس جەردە تۇراتىن ازاماتتاردى، سونداي-اق، باستاپقى مەديسينالىق-سانيتارلىق كومەك كورسەتەتىن مەكەمە جۇكتەمەسى شەكتەن اسىپ كەتكەن جاعدايدا تىركەۋدەن باس تارتۋى مۇمكىن. قولدانىستاعى نورماتيۆتەرگە سايكەس، ۋچاسكەدەگى جالپى پراكتيكا دارىگەرىنە تىركەلگەندەر سانى 1700-دەن اسپاۋى ءتيىس»، – دەپ حابارلادى وكىل.
سونداي-اق، بيىل تىركەۋ تارتىبىنە ءبىرقاتار وزگەرىستەر ەنگىزىلگەنىن اتاپ وتكەن ءجون. بۇدان بىلاي ەۋرازيالىق ەكونوميكالىق وداققا مۇشە مەملەكەتتەردەن كەلگەن ەڭبەك ميگرانتتارى ەمحاناعا تىركەلۋ ءۇشىن ەرىكتى مەديسينالىق ساقتاندىرۋ ءپوليسىن ساتىپ الۋى ءتيىس. ولار تىركەلۋ ءۇشىن ەمحانانىڭ تىركەۋ بولىمىنە بارىپ ءوتىنىش جازادى.
تىركەۋ ناۋقانىنا قوردىڭ مالىمەتتەر بازاسىنا ەنگەن ەمدەۋ مەكەمەلەرى عانا قاتىسادى. ولاردىڭ تولىق تىزىمىمەن مسق www.fms.kz رەسمي سايتىنداعى «ەمحانانى تاڭداۋ» بولىمىندە تانىسۋعا بولادى.